بارانبارین دەسپێدەکاتەوە

هەڤاڵ سەدیق گەڵۆزی، شارەزای بواری کەشناسی بڵاوی کردەوە: "لەسبەینێوە کە دەکاته ڕۆژی پێنجشەممە 2/4/2026، لە کاتەکانی نیوەڕۆ بەدواوە شەپۆلێکی بارانبارینی مامناوەند تەواوی ناوچەکانی هەولێر، دهۆک، زاخۆ، موسڵ، سۆران، سلێمانی، هەڵەبجە و گەرمیان دەکات."
ئاماژەشی بەوە داوە: "سەرەتای بارانبارینەکە لە کاتەکانی دوای نیوەڕۆ بەدواوە بۆ کاتەکانی نزیک عەسر لە ناوچەکانی ڕۆژئاوای هەرێمی کوردستانەوە دەستپێدەکات لە دهۆک، زاخۆ، سۆران و موسڵ، لە کاتەکانی ئێوارەی پێنجشەممەش کاریگەری شەپۆلەکە فراوانتر دەبێت و بارانبارین دەگاتە هەولێر، ناوچەکانی شەمامک، گوێڕ، دیبەگە، مەخموور، سەرگەڕان، قەراج و کەندیناوە و ناوچە شاخاوییەکانی هەولێر، هەروەها لەدرەنگانی شەویش کاریگەری شەپۆلەکە دەگاتە سنووری پارێزگای کەرکوک، سلێمانی و گەرمیان.
جەختیشی کردووەتەوە کە بە پلەیەک لەناوچەکانی هەولێر، دهۆک، زاخۆ، موسڵ، سۆران و ڕاپەڕین ئەگەری بارانبارینی مامناوەند بۆ بەخوڕ هەیە و بڕی بارانبارین لەو ناوچانە پێشبینی دەکرێت لەنێوان 10 - 20ملم بێت ئەگەری هەیە لە هەندێ ناوچە شاخاوییەکان بڕەکەی لەوە زیاتر بێت.
روونیشی کردووەتەوە کە لە ناوچەکانی کەرکووک، سلێمانی و هەڵەبجە بەپلە دوو بارانبارین دەیانگرێتەوە و بارانەکەی لەنێوان نمەباران بۆ بارانی مامناوەند دەبێت.