پەیامێکی بەپەلە لە كۆنسوڵخانەی ئەمریكا لە هەولێر گەیشت

کونسوڵخانەی گشتیی ویلایەتە یەکگرتووەکانی ئەمریکا لە هەولێر، ڕاگەیەندراوێکی بەپەلی بۆ هاووڵاتییانی وڵاتەکەی بڵاوکردەوە و تێیدا ئاماژەی بەوە کردووە کە چاودێری ئەو بانگەشانە دەکەن کە بۆ ئەنجامدانی خۆپیشاندان لە هەولێر و ناوچەکانی تری هەرێمی کوردستان بۆ ئەمڕۆ سێشەممە، 20ی کانوونی دووەمی 2026، کراون.

کونسوڵخانەی ئەمریکا داوای لە هاووڵاتییانی خۆی کردووە کە چاودێری میدیا ناوخۆییەکان بکەن بۆ وەرگرتنی دوایین زانیاری و بە هەموو شێوەیەک لە شوێنی گردبوونەوە و خۆپیشاندانەکان دوور بکەونەوە. لە ڕاگەیەندراوەکەدا هاتووە: "ئەم جۆرە خۆپیشاندانانە ڕەنگە بەبێ ئاگادارکردنەوەی پێشوەختە و بە خێرایی پەرە بسێنن، زۆرجار دەبنە هۆی پەککەوتنی هاتوچۆ و خزمەتگوزارییەکان، و هەندێک جار ڕەنگە توندوتیژییان لێ بکەوێتەوە."

هاوکات، وەزارەتی دەرەوەی ئەمریکا جەختی کردووەتەوە کە هۆشداریی گەشتکردن بۆ عێراق هێشتا لەسەر "ئاستی 4" (Level 4: گەشت مەکە) ماوەتەوە، ئەمەش بەهۆی مەترسییەکانی تیرۆر، ڕفاندن، ململانێی چەکداری، و نائارامییە کۆمەڵایەتییەکان.

کونسوڵخانەی ئەمریکا چەند ڕێنماییەکی بۆ هاووڵاتییانی لە هەرێمی کوردستان بڵاوکردووەتەوە، لەوانە:

دوورکەوتنەوە لە ناوچەکانی خۆپیشاندان و گردبوونەوە گەورەکان.

گرتنەبەری ڕێکاری وریایی ئەگەر بە شێوەیەکی چاوەڕواننەکراو کەوتیتە نزیک گردبوونەوەکان.

پاراستنی شێوازی ژیانی ئاسایی بەبێ سەرنجڕاکێشانی دەوروبەر (Keep a low profile).

بەردەوامبوون لە چاودێریکردنی میدیا ناوخۆییەکان.

لە کۆتایی ڕاگەیەندراوەکەدا، کونسوڵخانەی گشتی لە هەولێر و باڵیۆزخانەی ئەمریکا لە بەغدا ژمارە تەلەفۆن و ئیمەیڵی تایبەتیان بۆ هەر بارودۆخێکی نائاسایی و داواکردنی هاوکاری بڵاوکردووەتەوە.