ئەو کەسانە دادەمەزرێن

وەزارەتی خوێندنی باڵای هەرێمی كوردستان، لە ئەمڕۆوە سێ یەكەمەكان و خاوەن بڕوانامە باڵاكانی ناوچەكانی دەرەوەی هەرێم، دەتوانن سەردانی تۆماری زانكۆكان بكەن بۆ وردەكاریی لەبارەی پێشكەشكردنی فۆرمی داتاكان.

ئەمڕۆ چوارشەم 30ـی تەمووز، وەزارەتی خوێندنی باڵا و توێژینەوەی زانستی بڵاوی كردەوە، بۆ پرۆسەی دامەزراندنی سێ یەكەمەكان و هەڵگرانی بڕوانامە باڵاكانی زانكۆكانی هەرێمی كوردستان لە دانیشتووانی پارێزگاكانی دەرەوەی ئیدارەی هەرێمی كوردستان لەسەر میلاكی حكوومەتی فیدراڵی.

ئاماژە بەوەش كراوە، وەزارەتی خوێندنی باڵا و توێژینەوەی حكوومەتی هەرێمی كوردستان، ئاگاداری سێ یەكەمەكان و هەڵگرانی بڕوانامە باڵاكان دەكاتەوە، لینكی ناردنی داتاكانی ئەنجوومەنی ڕاژەی گشتیی فیدراڵی لەلایەن وەزارەتەوە، ئاراستەی سەرجەم تۆماری گشتیی زانكۆكان كراوە.

لە كۆتایی راگەیەنراوەكەدا هاتووە، بۆ ئەم مەبەستە ئاگادارتان دەكەینەوە لە ئەمڕۆوە دەتوانن سەردانی تۆماری گشتیی زانكۆكانتان بكەن، بۆ زانیاری و وردەكاری لەبارەی چۆنیەتیی دەستپێكردنی پرۆسەكە و پێشكەشكردنی فۆرمەكان، دواتریش لە ڕێگەی تۆماری زانكۆكانەوە ڕاستەوخۆ داتاكان بۆ ئەنجوومەنی ڕاژەی گشتی فیدراڵی دەنێردرێت.