بەڕێوەبەری گشتیی بازرگانی هەرێمی كوردستان، پێشبینی دەكات كە لە مانگی رەمەزاندا بەشەخۆراكێكی تر بەسەر هاووڵاتییاندا دابەش بكرێت.
ئەمڕۆ یەكشەم 16ی ئادار، نەوزاد شێخ كامیل بەڕێوەبەری گشتیی بازرگانیی هەرێم، راگەیاند، پێشبینی دەكەین كە لە مانگی رەمەزاندا بەشەخۆراكیكی تر دابەش بكرێت، بەڵام هێشتا دڵنیانین كە بەغدا رەوانەی دەكات یان نا.
هەفتەی رابردوو بەشەخۆراكێك بەسەر هاووڵاتییاندا دابەش كرا كە هیچ جیاوازییەكی لەگەڵ مانگەكانی رابردوو نەبوو، لە كاتێكدا پێشتر بانگەشەی ئەوە دەكرا كە بەشەخۆراكی رەمەزان مادەكانی زیاتر دەكرێت.
بە گوتەی نەوزاد شێخ كامیل، لەمساڵدا ئەوەی دابەش كراوە لە بریكارەكان بەشەخۆراكی مانگی یەكە كە بریتییە لە برنج و زەیت و شەكر و نۆك و لەتكەنۆك و فاسۆڵیا و نیسك و دۆشاوی تەماتە.
هەروەها گوتی، ئەو بەشەخۆراكەیشی كە پێشبینی دەكەین رەوانە بكرێت، هی مانگی دووی ئەمساڵە كە رەنگە لەم مانگەدا بۆ رەمەزان و پێش جەژن بگات.
لە كۆتاشدا باسی لەوە كرد، تا ئیستەش هیچ بڕیار و زانیارییەكمان پێنەگەیشتووە لەبارەی زیادكردنی مادەی نوێ بۆ بەشەخۆراكی مانگی دوو، كە ئایا زیاد دەكرێت یان نا، بەهۆی مانگی رەمەزانەوە.
وەڵام بدەوه