پرۆژەی سەوزكردنی ئاڵوگۆڕی شەقامی هەولێر - شەقڵاوە بۆ هەولێر - پیرمام جێبەجێ دەكرێت و هەوڵدەدرێت لەمساڵدا تەواو بكرێت و بەڕووی هاووڵاتیانی شاری هەولێر و دەوروبەری بكرێتەوە.
وەزارەتی شارەوانیی و گەشتوگوزار بڵاوی کردووەتەوە: "ئەمڕۆ یەكشەممە 2/3/2025 ساسان عەونی، وەزیری شارەوانی و گەشتوگوزار بە یاوەری كارزان عەبدولهادی، سەرۆكی شارەوانیی هەولێر، سەردانی پرۆژەی سەوزكردنی ئاڵوگۆڕی شەقامی هەولێر- شەقڵاوە بۆ هەولێر- پیرمامی كرد."
ئاماژە بەوەش کراوە: "ئەو پرۆژەیە لە چوارچێوەی پلانی حكوومەتی هەرێمی كوردستان و وەزارەتی شارەوانیی و گەشتوگوزار بۆ زیادكردنی ڕێژەی سەوزایی لە شاری هەولێر و بایەخدانی زیاتر بە پرد و یەكتربڕەكانی شاری هەولێر لە ڕووی سەوزكردن و جوانكارییەوە جێبەجێ دەكرێت."
ئەوەش خراوەتە روو: "ڕووبەری پرۆژەكە 50 هەزار مەترە و زیاتر لە 1407 دار و گوڵ و لەگەڵ چەندین خەزانی ئاو و چیمەن و سیستەمی ئاودان و ڕووناككەرەوە و چەندین تایبەتەمەندی دیكەش لەخۆدەگرێت و هەوڵدەدرێت لەمساڵدا تەواو بكرێت و بەڕووی هاووڵاتیانی شاری هەولێر و دەوروبەری بكرێتەوە."
روونیش کراوەتەوە: "ئێستا كاركردن لە پرۆژەكەدا زۆر بە باشی بەڕێوەدەچێت، ساسان عەونی، وەزیری شارەوانی و گەشتوگوزار ئامادەیی هەر جۆرە هاوكاری و ئاسانكارییەكی بۆ تیمەكانی جێبەجێكاری پرۆژەكە دەربڕی بۆ ئەوەی لەمساڵدا تەواو بكرێت
وەڵام بدەوه