لە هەولێر کۆبوونەوەیەکی تایبەت سەبارەت بە مانگی پیرۆزی ڕەمەزان ئەنجامدرا و چەند بڕیارێك تایبەت بە بازاڕ و كەمكردنەوەی دەوامی فەرمانگەكان و پێدانی كارەبای نیشتمانی و مۆلیدە ئەهلییەكان دران.
بەپێی راگەیاندراوێكی پارێزگای هەولێر، ئەمڕۆ پێنجشەممە 2025/2/27، بە سەرپەرشتیی ئومێد خۆشناو، پارێزگاری هەولێر، لە دیوانی پارێزگا، سەبارەت بەهاتنی مانگی پیرۆزی ڕەمەزان و نرخی کەل و پەل و کاڵا و پێداویستییەکانی هاووڵاتیان کۆبوونەوەیەکی تایبەت ئەنجامدرا.
بەپێی راگەیاندراوەكە لە کۆبوونەوەکەدا، ئەو بڕیارانە دران:
*لیژنەی قایمقامیەتەکان، بازرگانی، شارەوانی، تەندروستی و لایەنەکانی دیکەی پەیوەندیدار، بەردەوام بن لە چاودێریکردنی بازاڕ و نرخ و کەلوپەل و پێداویستییەکانی هاووڵاتیان.
* نابێت ڕێگە بە هیچ کەسێک بدرێت، مانگی پیرۆزی ڕەمەزان، بقۆزیتەوە و یاری بە بازاڕ بکات و نرخی خۆراک و کەل و پەل و پێداویستی لە سەر هاووڵاتیان گران بکات.
* ڕێکاری یاسایی بەرامبەر هەموو ئەو کەس و لایەنانە بگیرێتەبەر کە یاری بە بازاڕ دەکەن و نرخی خۆراک و پێداویستی لە سەر هاووڵاتیان زیاد دەکەن.
*لە پێناو پاراستن و سەلامەتی گیانی هاووڵاتیان و ڕێگەگرتن لە ساغکردنەوەی خۆراکی ماوه بەسەرچوو و بێ کوالێتی، هەڵمەتی لیژنەکان و بەدواداچوون و پشکنین بۆ کۆگاکانی خۆراک، درمان، مۆڵ، مارکێت و شوێنەکانی تری هاوشێوەیان لەناو شار و دەرەوەی شار بەردەوام بێت.
* لە بازگەکان چاودێری تووند بکرێت و ڕێگە نەدرێت خۆراک و کەلوپەلی ماوە بەسەرچو هاوردەی سنووری پارێزگای هەولێر بکرێت.
*تیمەکانی شارەوانی لە ڕێکخستنی بازاڕ و چاودێریکردنی شوێنە گشتیەکان و پاککردنەوەی بەردەوامی نێو بازاڕ و شوێنە گشتیەکان بەردەوام بن.
* ڕێکخستنی خشتەی مۆلیدە ئەهلییەکان و کارەبای نیشتیمانی، دەبێت لە کاتی بەربانگ و پارشیوان دا کارەبا بە هاووڵاتیان بدرێت.
*کوشتارگەی هاوچەرخی هەولێر و فێتەرنەری بە هاوبەشی لەگەڵ لیژنە و لایەنە پەیوەندیدارەکان، وەکو ساڵان ڕێو شوێنی پێویست بگرنەبەر.
*ئامادەباشی هێزەکانی پۆلیس، ئاسایش و گرتنەبەری ڕێکارێکی پێویست لە شوینە گشتییەکان بە تایبەتی لە شەوانی مانگی پیرۆزی ڕەمەزان، لە پێناو پاراستنی ئارامی و ئاسایشی شار و سەر و ماڵی هاووڵاتیان.
*کردنەوەی بازاڕی شەوانی ڕەمەزان لە سەنتەری شار لەلایەن سەرۆکایەتیی شارەوانی هەولێر، لەڕووی ڕێکخستن و ڕێکارەکانی بە باشی وبەبێ کەم و کوڕی بەڕێوە ببرێت.
* تەنیا لە 10 شەوە كۆتاییەكانی مانگی ڕەمەزانی پیرۆز دەرگای مزگەوتەكان كراوە دەبن تا نوێژی بەیانی، تەنیا پێش نوێژ و وتارخوێنی فەرمیی مزگەوتیش بۆیان هەیە مەراسیمە ئایینیەكان و تەراویح ئەنجام بدەن، بەپێچەوانەوە هیچ كەسێكی تر بۆی نیە چالاكی ئەنجام بدات.
*لە مانگی پیرۆزی ڕەمەزاندا دەوامی فەرمی لە دامودەزگا و فەرمانگەكانی حكوومەت لە سنووری پارێزگای هەولێر بۆ ماوەی یەك كاتژمێر كەم بكرێتەوە.
وەڵام بدەوه