ئێستا نیاز و هەوڵێكی رژد لە لایەن بەغداوە بۆ دەست پێكردنەوەی هەناردنی نەوتی هەرێمی كوردستان هەیە، بەتایبەتی لە دوای هەمواركردنەوەی یاسای بودجەی عێراق پێوەست بە نەوتی هەرێمی كوردستان، وەزارەتی دەرەوەی توركیا ئاشكرای كرد كە لەگەڵ بەغدا و هەولێر سەبارەت بە هاریكاریی نەوتییەوە گفتوگۆیان هەیە.
بەپێی دوایین زانیارییەكان سەبارەت بە هەناردەكردنەوەی نەوتی هەرێمی كوردستان، لە دوای پەسندكردنی هەمواری یاسای بودجە، تەنیا چەند بابەتێكی تەكنیكی لە نێوان هەولێر و بەغدا ماوە، خەریكە ئەوانیش چارەسەر دەبن، واتە تەنیا رێككەوتن لەگەڵ توركیا دەمێنێت.
وەزارەتی دەرەوەی توركیا لە پۆستێك لە لاپەڕەی خۆی لە تۆڕی كۆمەڵایەتیی ئێكس نووسیویەتی، عائیشە بریس ئاكنجی جێگری وەزیری دەرەوەی توركیا لە بەغدا گفتوگۆی لەگەڵ حەیان عەبدولغەنی وەزیری نەوتی عێراق كردووە، هەردوولا باسی هاریكارییان لە بواری نەوت كردووە.
لە پۆستێكی تردا وەزارەتی دەرەوەی توركیا دووپاتی كردەوە كە هەروەها ئاكنجی لە هەولێر چاوی بە نێچیرڤان بارزانی سەرۆكی هەرێمی كوردستان كەوتووە و تاوتوێی پێوەندییە دووقۆڵییەكان و پەرەسەندنەكانی ناوچەكەیان كردووە.
شایەنی باسە دیدارەكانی جێگری وەزیری دەرەوەی توركیا لە بەغدا و هەولێر دوای راگەیاندنی وەزیری نەوتی عێراق لە یەكشەمی رابردوو دێت بەوەی عێراق بە نیازە لە ماوەی هەفتەیەك دەست بە هەناردەكردنەوەی نەوت بەرەو توركیا بكات، لە دوای وەستانی لە 25ی ئاداری 2023.
وەڵام بدەوه