سەرۆكی حكوومەت لەگەڵ وەزیری وزە و ژێرخانی ئیمارات كۆبووەوە

مەسروور بارزانی سەرۆكی حكوومەتی هەرێمی كوردستان، لەگەڵ سوهەیل مەزروعی وەزیری وزە و ژێرخانی ئیمارات كۆبووەوە، پەرەپێدانی هاریكاری و هاوئاهەنگیی لە نێوان هەردوولا لە بواری وزە و پێشخستنی ژێرخانی ئابووری تاوتوێ كرا.

ئەمڕۆ پێنجشەم 13ـی شوبات، مەسروور بارزانی سەرۆكی حكوومەتی هەرێمی كوردستان لە دوبەی، لەگەڵ سوهەیل مەزروعی وەزیری وزە و ژێرخانی ئیمارات كۆبووەوە.  

لە كۆبوونەوەكەدا كە قوباد تاڵەبانی جێگری سەرۆكی حكوومەت ئامادەی بوو، پەرەپێدانی هاریكاری و هاوئاهەنگیی لە نێوان هەردوولا لە بواری وزە و پێشخستنی ژێرخانی ئابووری تاوتوێ كرا. 

سەرۆكی حكوومەت كورتەیەكی لەبارەی چاكسازییەكانی حكوومەت لە بواری وزە و باشتركردنی كەرتی كارەبا و خزمەتگوزارییە گشتییەكان، هەوڵەكانی حكوومەت بۆ دابینكردنی كارەبای 24 سەعاتی لە هەرێمی كوردستان لە كۆتایی ساڵی 2026 خستەڕوو.

 وەزیری وزە و ژێرخانی ئیمارات، ئامادەیی تەواوی وڵاتەكەی دەربڕی بۆ هاوكاریكردنی هەرێمی كوردستان لە سوودوەرگرتن لە شارەزایی ئیمارات لە بواری وزە و وزەی نوێبووەوە و كارەبادا.