ئەو پەرلەمانتارە کێیە سەردانی خێمەی سلێمانی کرد پێشتر چۆ دژایەتی کوردی کردووە

یوسف كیلابی، ئەو پەرلەمانتارە عەرەبە نەیارەی هەرێمی كوردستان كە لە ماوەی چەند ساڵی رابردووی پەرلەمانتارێتیی خۆیدا بە ئاشكرا دژایەتیی كورد و هەرێمی كوردستانی كردووە، لە لایەن پەرلەمانتارانی حزبەكانی سلێمانییەوە بردرایە سەیرانی مانگرتووەكانی ژێر خێمەكەوە!
بەختەوەر سەپان، پارێزەر و چالاكی سیاسی بە رایگەیاند، ئەمڕۆ هەینی، ژمارەیەك پەرلەمانتاری یەكێتی و نەوەی نوێ، یوسف كیلابی، پەرلەمانتاری شۆڤێنیی عێراقیان بردە سلێمانی و وەك ئەوەی دەستكەوتێكی گرنگیان بەدەست هێنابێت، لە میدیاكانی حزبەكانی سلێمانییەوە، بانگەشەی ئەوەیان كرد كە كیلابی سەردانی ژێر خێمەكەی كردووە!
ڕوونیشی كردەوە، لەوەتەی بۆتە ئەندامی پەرلەمانی عێراق، یوسف كیلابی بە شێوەیەكی بەردەوام دژایەتیی هەرێمی كوردستانی كردووە، تەنانەت ئەو كاتەی یاسای بودجەی گشتیی سێ ساڵەی عێراق پەسەند كرا، یوسف كیلابی و مستەفا سەنەد كە دوو پەرلەمانتاری شۆڤێنیی عێراقن، دەیانگوت گۆڵمان لە كورد كرد، كەچی حزبە سەركزەكانی سلێمانی شانازی بەوەوە دەكەن كە توانیویانە فاشییەكی وەك كیلابی ببەنە سلێمانی.
ئەوەشی ئاشكرا كرد كە هەر ئەو یوسف كیلابییە، یەكێكە لەوانەی كە سكاڵای لە دادگای فیدڕاڵی تۆمار كردووە و داوا دەكات دادگای فیدراڵیی عێراق سێ یاساكە رەت بكاتەوە كە یەكێك لەو سێ یاسایە، یاسای گەڕاندنەوەی موڵك و ماڵەكان بۆ خاوەنەكانیان كە هەندێك بڕیاری ئەنجوومەنی باڵای شۆڕش (هەڵوەشاوە) دەیانگرێتەوە و بەهۆیەوە زەوی و زارێكی زۆر بۆ كوردان دەگەڕێتەوە.