بە ئامادەبوونی سەرۆکی حکوومەت، ڕێوڕەسمی ساڵیادی شەهیدانی یەکی شوبات بەڕێوە دەچێت

كاتژمێر 10ی به‌یانیی ئەمڕۆ شەممە 1ی 2ی 2025، بە ئامادەبوونی مەسرور بارزانی، سەرۆکی حکوومەتی هەرێمی کوردستان، ڕێوڕەسمی ساڵیادی شەهیدانی یەکی شوبات لە هەولێر بەڕێوە دەچێت.
لە ڕۆژى (١)ى شوباتى ساڵى 2004 تیرۆریستانى دوژمنى ئارامى و پێکەوەژیان لە دوو کردەوەى خۆکوژیدا لە هەردوو لقى (٢)ى پارتى دیموکراتى کوردستان و مەڵبەندى (٣)ى یەکێتىی نیشتیمانىی کوردستان لە شارى هەولێرى پایتەختى هەرێمى کوردستان (103) بەرپرسى حکوومى و سەرکردە و کادیر و پێشمەرگە و ئەندامانى هەردوو حزب و هاووڵاتیان شەهید کرد و ژمارەیەکى تریش بریندار بوون.
ئەگەر چى تیرۆریستان بەو کارەیان ئامانجیان تێکدانى ئاشتى و گیانى لێبوردەیى و خۆشیەکانى جەژن بوو، بەڵام خوێنى شەهیدان و قوربانیەکان بوونە هەوێنى زیاتر بەهێزکردنى گیانى پێکەوەژیان و تەبایى و یەکێتىی ڕیزەکانى گەلى کوردستان، نەک هەر هێندە، بەڵکوو ئیرادەى بەرگرى و قارەمانێتى هێزى پێشمه‌رگه‌ لە کوردستان پاش چەند ساڵێک داستانى مەزنى لە ڕووبەڕووبوونەوەى گەورەترین ڕێکخراوى تیرۆریستى تۆمار کرد و لە برى جیهان شەڕى تیرۆریستانى داعشى کرد بە جۆرێک کە مرۆڤایەتى بە شانازییەوە ئاماژەى پێدەکات.
له‌ شاری هه‌ولێر ساڵانه‌ ڕێوره‌سم بۆ ساڵیادی شه‌هیدانی 1ی شوبات به‌ڕێوه‌ ده‌چێ و ئه‌مڕۆ به‌ ئاماده‌بوونی سه‌رۆكی حكوومه‌ت ئه‌و ڕێوره‌سمه‌ به‌ڕیوه‌ ده‌چێت