هێزێکی ئەمنی هەڵی کوتایە سەر ماڵی هونەرمەندێک و هاوڵاتییەک دەستگیر کرا

میریان قادر تۆمارێكی ڤیدیۆیی بڵاو كردەوە و رای گەیاند، هێزێكی ئاسایش لە سلێمانی براكەیان بەبێ فەرمانی دادوەر گرتووە.

میریان قادر چالاكی تۆڕە كۆمەڵایەتییەكان، تۆمارێكی ڤیدیۆیی بڵاو كردەوە و تێیدا رای گەیاند: شەوی رابردوو لە سلێمانی، هێزێكی تەناهی بە سێ ئۆتۆمبێلی ئاسایشەوە هەڵیانكوتایە سەر ماڵی من، براكەمیان گرتووە. برا و برازام بەدوایاندا ڕۆیشتوون و تا ئێستە كەس نازانێ لە كوێن.

میریان دەشڵێت: هەر ئەو هێزە مۆبایلیان لە براژنم وەرگرتووە، چەند سەعاتێك پێشتریش مۆبایلیان لە براكەم وەرگرتووە، هەموویان پشكنیوە، هەموو ئەوەشی كردوویانە بەبێ فەرمانی دادوەر بووە.

میریان قادر بە بافڵ تاڵەبانی دەڵێت: تۆ گوتت لە سلێمانی یاسا سەروەر دەكەم، ئەوەی ئەمشەو كراوە خەتای برای من چییە كە خوشكەكەی لە هەولێرە و رەخنە دەگرێت.

هاوكات داوای لە هەموو لایەنە پێوەندیدارەكان كردووە بچنە سەر هێڵ و دەشڵێت: "سەلامەتیی ژیانی برام لە ئەستۆی بافڵ تاڵەبانییە"