نرخی بەنزین بەردەوامە لە دابەزین

بەهۆی پشووەكانی سەری ساڵەوە خواست لەسەر بەنزین لە هەرێمی كوردستان كەم بووەتەوە، ئەمەش بووەتە هۆی دابەزینی نرخەكەی.

ئێستە لە سلێمانی نرخی هەرسێ جۆرەكەی بەنزین بۆ هەر لیترێك 25 دینار كەم كراوەتەوە، گوتەبێژی بەنزینخانەكانی سلێمانیش دەڵێت، هۆكارەكەی زۆریی بەنزین و كەمبوونەوەی خواستە.

ئەمڕۆ یەكشەم 29ی كانوونی یەكەم، بەهمەن قادر گوتەبێژی بەنزینخانەكانی سلێمانی رای گەیاند، بەنزین بۆ هەرسێ جۆرەكەی نۆرماڵ و موحەسەن و سوپەر بۆ هەر لیترێك 25 دینار كەم كراوەتەوە.

لە سلێمانی یەك لیتر بەنزینی نۆرماڵ لە 950 دینار بۆ 925 دینار، موحەسەن لە هەزار و 150 بۆ هەزار و 125 دینار، سوپەر لە هەزار و 250 بۆ هەزار و 150 بۆ هەر لیترێك دابەزیوە.

پێشتریش لە هەولێر بەهۆی زیادكردنی بڕی بەرهەمهێنانی بەنزین، هەردوو كۆمپانیای لاناز و كار، نرخی بەنزینیان دابەزاند بەتایبەت نرخی بەنزینی نۆرماڵ.

هاوكات وەزارەتی سامانە سروشتییەكان بەپێی پلانێكی نوێ، رۆژانە بەنزینی كوالێتی بەرز بەنرخی 750 دینار لە شار و شارۆچكەكان دەفرۆشێت و زۆرینەی شۆفێران لەو بەنزینخانانە بەنزین دەكڕن، ئەمانە تێكڕا بوونەتە هۆی ئەوەی خواست لەسەر بەنزین كەم ببێتەوە و نرخی دابەزێت