سبەی پارەی ئەو کەسانە دابەشدەکرێت

سبەی بەشێكی دیكەی پارەی گەنمی ئەمساڵی جووتیاران لە هەولێر و كۆیە دابەش دەكرێت.
ئەمڕۆ دووشەممە 23ی 12ی 2024، سایلۆی هەولێر بڵاوی كردەوە: "سبەی سێشەممە 24ی 12ی 2024، ئەو جووتیارانەی لە زنجیرە چوار هەزار و 709 تاوەكوو چوار هەزار و 960، کە گەنمەکانیان ڕادەستی سایلۆی هەولێر کردووە لە سایلۆی هەولێر چەک وەردەگرن."
ئاماژە بەوەش كراوە، ئاگاداری جووتیارانی شاری کۆیە دەکەنەوە، كە سبەی 24ی 12ی 2024، دابەشکردنی چەکی جووتیاران دەست پێدەکات لە زنجیرە 726 تاوەكوو 950، كە گەنمەکانیان ڕادەستی گۆرەپانی کۆیە کردووە لە سایلۆی قوشتەپە چەک وەردەگرن و پارەکانیان لە بانکی بەحرکە وەردەگیرێت.

سایلۆی هەولێر لە ئاگادارییەكەیدا ئاماژەی بەوەش داوە "⁠ئەو کەسەی چەکی بەناوە دەبێت خۆی ئامادەبێت و یاخود بریکارنامەی (وەکالە) پەسەنکراوی ئەمساڵ بێت، ئەگەر خاوەن چەک وەفاتی کردبێت دەبێت دابەشنامەی (شرعی) یان یاسایی بهێنێت لەگەل بریکارنامەی گشت وارسەکان."
پێشتر نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی کوردستان راگەیاندبوو: "دوا بڕەپارەی گەنمی جووتیاران بەگشتی 125 ملیار و 852 ملیۆن دینارە، بۆ سلێمانی 47 ملیار و 642 ملیۆن دیناره، بۆ هەولێر 44 ملیار و 45 ملیۆنە، بۆ دهۆکیش 34 ملیار و 165 ملیۆن دیناره."