شەپۆلێکی بارانبارین هەرێمی کوردستان دەگرێتەوە

شارەزایەکی بواری کەشناسی ئاشکرای کرد کە لە سبەی ئێوارەوە کەشێکی ناسەقامگیر ڕوو لە هەرێمی کوردستان دەکات.

ئەمشەو شەممە 7/12/2024، هەڤاڵ سەدیق گەڵۆزی، شارەزای بواری کەشناسی بڵاوی کردەوە: "سبەی ئێوارە کەشێکی ناسەقامگیر ڕوو لە هەرێمی کوردستان دەکات کە شەپۆلێکی تاوە بارانبارینی ماوە کورت و هەورەبرووسکە چەند ناوچەیەک دەگرێتەوە."

ئاماژەشی بەوە داوە: "لە ناوچەکانی باشووری رۆژئاوای هەولێر، دەشتی قەراج و مەخموور و دیبەگە ئەگەری بارانبارین هەیە."

روونیشی کردووەتەوە: "لە تەواوی پارێزگای کەرکووک ئەگەری بارانبارین هەیە، بەڵام ناوچەکانی باکووری رۆژهەڵات و باکووری رۆژئاوای کەرکووک (ناحیەی شوان، پردی، دوبز، سەرگەڕان، مەلا عەبدوڵا، چەمچەماڵ، قەرەنجیر، قادرکەرەم، ئەگەری نمەباران بۆ بارانی مامناوەند هەیە."

هەروەها ئەو شارەزایەی بواری کەشناسی ئەوەشی خستووەتە روو: "لە تەواوی ناوچەکانی پارێزگای سلێمانی، پارێزگای هەڵەبجە، ئیدارەی ڕاپەڕین و ناوچەکانی باکووری گەرمیان ئەگەری تاوەباران و هەورەبرووسکە هەیە."

ئاماژەشی بەوە داوە: "لە ناوچەکانی سنووری سۆران و زاخۆ، دهۆک و مووسڵ، ئاسمان هەوردەبێت و کاریگەری شەپۆلەکە لاوازە ئەگەری بارانبارین لاوازە لەوانەیە لەهەندێ ناوچە نمەباران ببارێ."

راشی گەیاندووە: "زۆرترین بڕی بارانبارین پێشبینی دەکرێت لە دوکان، خەلەکان، تەقتەق و کۆیە و دەورووبەری ببارێت لە نێوان 10-15ملم ئەگەری بارانی مامناوەند بۆ بارانی بەخووڕهەیە."

هەروەها جەختیشی کردووەتەوە: "پلەکانی گەرما 2 تا 3 پلەی سیلیزی دادەبەزێ و لە هەندێ لە ناوچە شاخاوییە سنوورییەکانیش ئەگەری بەفربارین هەیە."

روونیشی کردووەتەوە: "کاریگەری ئەم شەپۆلە تاوەکوو بەرهبەیانی ڕۆژی دووشەممە دەبێت و لەدوای رۆژهەڵاتن بە دواوە بەرەو لاوازبوون دەچێت و بارانبارین کۆتایی دێت."