سەرۆكی هەرێمی كوردستان ڕای گەیاند، نابێت بانگەشەی هەڵبژاردن بەشێویەك بێت یەكتر بشكێنن و بسڕنەوە، نابێت بانگەشەكان بەشێوەیەك بن ئاسایشی كۆمەڵایەتی هەرێمی كوردستان تێكبدەن.
ئەمڕۆ یەكشەم 15ـی ئەیلوول، نێچیرڤان بارزانی سەرۆكی هەرێمی كوردستان، لە كۆنگرەیەكی ڕۆژنامەوانیدا ڕای گەیاند، لە ماوەی ئەم سێ ساڵەدا كار و پڕۆژەی زۆر جوان باش كراوە بۆ ئیدارەی سەربەخوی زاخۆ.
زیاتر گوتی، ئەوەی دەمەوێت بیڵێم ئەوەیە كە خەڵكی ئێمە شایانی خزمەتگوزاریی زۆرترە، پێویستیان بە خزمەتگوزارییە، دەستخۆشی لە هەموو ئەو كەسانە دەكەم كە كاری باشیان بۆ ئەم ئیدارەیە كردووە.
باسی لەوەش كرد، دەبێت بانگەشە بكرێت، بەڵام بە شێوازێك بێت كەس كەس نەشكێنێت، لە ئەنجامدا هەموومان لەناو كەشتییەكین، هەڵبژاردن شتێكی ئاساییە و دەكرێت، بەڵام نابێت بگاتە ئاستی یەكتر شكاندن و یەكتر سڕینەوە. نابێت بانگەشەی هەڵبژاردن بەشێوەیەك بێت ئاسایشی كۆمەڵایەتی هەرێمی كوردستان تێكبدا.
لەبارەی كێشەكانی بەغدا لەگەڵ هەرێم نێچیرڤان بارزانی گوتی، حكوومەتی هەرێم هەوڵ دەدات كێشەكان چارەسەر بكات، ئێمە كارەكانمان دیارە دەمانەوێت هەموو كێشەكان لە چوارچێوەی دەستووری عێراق چارەسەر بكرێت، هەروەها لەدوای ئەوەی ئەو شاندە لە بەغدا هاتن، شتی روون ئەوەیە کە مووچە دەدرێت ئێمە داوای لێبووردن دەکەین، هەندێ جار دوادەکەوێت، بەڵام پێموانییە کێشە بۆ پرسی مووچە دروستبێتەوە.
"هاتنی ئێمە بۆ ئەم دەڤەرە بۆ ئەوەیە لە نزیكەوە ئاگاداری بارودۆخی ئێرە بین، ئەوەی لەم دەڤەرەش بینم كارێكی باش و جوان كراوە، دەستخۆشی لە هەموو ئەو كەسانە دەكەم كە ماندوو بوون بە زاخۆوە"، نێچیرڤان بارزانی وای گوت.
وەڵام بدەوه