دەست بە دابەشکرنی نەوتی ماڵان دەکرێت

لە ناوچە شاخاوییەکان دەست بە دابەشکردنی نەوتی سپی دەکرێت و قایمقامیەتی چۆمانیش ئاشکرای دەکات، 200 لیتر نەوت بە 104 هەزار دینار دابەش دەکرێت.

قائیمقامیەتی قەزای چۆمان، بڵاوی کردەوە: "سەرجەم بریکارەکانی خۆراک لە سنووری قەزای چۆمان، هەر چوار ناحیەکانی سمیلان، گەڵالە، حاجی ئۆمەران، قەسرێ، ئاگادار دەکەینەوە، کە بۆ وەرگرتنی بەشەنەوتی ئەمساڵ، هاووڵاتییان ئاگادار بکەنەوە و پارەی ئەو بەشە نەوتە لە هاووڵاتییان وەربگرن."

ئاماژەی بەوەش کرووە: "نوێنەری بەڕێوەبەرایەتیی نەوت و کانزاکانی سۆران دەستدەکات بە دابەشکردنی بەشە نەوت لە سەنتەری قەزا و ناحیەکانی سنوورمان."

قائیمقامیەتی قەزای چۆمان لەبارەی نرخی نەوتەکە ئاشکرای کردووە، 200 لیتر نەوتیان پێ دەدرێ و بڕی 104 هەزار دینار وەردەگیرێت، بەڵام ئەگەر لەپێش ماڵی هاووڵاتییان دابەش بکرێت، دوو هەزار دیناری دیکە وەردەگیرێت.

رۆژی 5/9/2024، وەزارەتی سامانە سروشتییەكان ڕاگەیاندراوێكی بڵاو كردەوە و ئاشکرای کرد: "سەرۆکی حکوومەتی هەرێمی کوردستان، لە فەرمانێکدا وەزارەتی سامانە سروشتییەکانی ڕاسپاردووە، دەست بە پرۆسەی دابەشکردنی نەوتی سپی و دابەزینی نرخی بەنزین بکرێت."

وەزیری سامانە سروشتییەکان جەختی کردەوە، ئامادەکارییەکان دەستیان پێ کردووە، تاوەکوو بەم نزیکانە لەسەرەتادا لە ناوچە شاخاوییەکان دەست بە دابەشکردنی نەوتی پاڵپشتیکراوی حکوومەتی هەرێمی كوردستان بکرێت.