دەست بە دابەشکردنی مووچەی ئەم کەسانە دەکرێت

بەرپرسێكی گەنجینەی وەزارەتی دارایی ئاشكرای دەكات، بڕیاری خەرجکردنی مووچەی مانگی چواری مامۆستایانی وانەبێژ دراوە و لە سبەیەوە خەرج دەکرێت.

سیامەند ئیسماعیل، بەڕێوەبەری گەنجینەی ئیدارەی سۆران، ڕاگەیاند: "بڕیاری خەرجکردنی مووچەی وانەبێژان هاتووە، سبەی دەست بە خەرجكردنی دەكرێت و ئەوەی چەكی ئامادە بێت پارە وەردەگرێت."

بەپێی ڕێنوێنیی ژمارە 14ی دارایی، ئەو مامۆستا وانەبێژانەی هەڵگری بڕوانامەی دبلۆمن، 350 هەزار دیناریان بۆ خەرج دەکرێت و بۆ هەڵگرانی بڕوانامەی بەکالۆریۆسیش، 400 هەزار دینار خەرج دەکرێت.

لای خۆیەوە، كارۆخ عەبدوڵا، نوێنەری مامۆستایانی وانەبێژ راگەیاند: "ئەمڕۆ چەکی مووچەی وانەبێژان ئامادە كرا و تاوەكوو كۆتایی هەفتە مووچەی وانەبێژانی سەرجەم پەروەردەکان دابەش دەكرێت."

ژمارەی مامۆستایانی وانەبێژ لە هەرێمی کوردستان 37 هەزار و 740 مامۆستان، مووچەی مانگانەیان لە 13 ملیار و 700 ملیۆن دینار زیاترە.