نرخی مریشکی زیندوو لە بازاڕەکانی هەرێمی کوردستان دابەزی و کیلۆی بە 2750 دینارە.
نرخەکە زیاتر لە مانگێکە روو لە دابەزینە. ئەمڕۆ چوارشەممە، بەشدار رەشۆ، مریشکفرۆش لە شاری هەولێر راگەیاند، کیلۆیەک مریشک 2750 دینارە.
نێوەڕاستی شوباتی ئەم ساڵ، نرخی کیلۆیەک مریشکی زیندوو گەیشتە 4000 دینار. کۆتایی مانگی رابردوو دابەزی بۆ 3500 دینار.
لەبارەی هۆکاری دابەزینی نرخەکەوە بەشدار رەشۆ وتی، مریشک لە بازاڕدا زۆرە و کڕیاری کەمە، بەراورد بە رابردووش مریشکی کەمتر هەناردەی پارێزگاکانی دیکەی عێراق دەکرێت.
بەگوێرەی وەزارەتی کشتوکاڵی هەرێمی کوردستان، ساڵانە زیاتر لە 105 ملیۆن مریشک لە هەرێمی کوردستان گەورە دەکرێن کە دەکەنە نزیکەی 250 هەزار تۆن گۆشت، لە کاتێکدا پێداویستیی ساڵانەی گۆشتی مریشک لە نێوخۆدا 146 هەزار تۆنە. ئەوەی لە پێداویستی نێوخۆ زیاترە هەناردەی پارێزگاکانی عێراق دەکرێت.
وەڵام بدەوه