ئەمڕۆ پێنجشەممە 4/1/2024، وەزارەتی شارەوانی و گەشتوگوزار ڕاگەیاندراوێكی لە پەیجی فەرمیی خۆی، لە تۆڕی كۆمەڵایەتیی (فەیسبووك) بڵاو كردەوە، تێیدا هاتووە: "ڕەزامەندیی لەسەر خەرجكردنی گوژمەی ملیارێك و 309 ملیۆن دینار بە مەبەستی گەیاندنی خزمەتگوزاری بۆ گەڕەكی مەریوان لە كەرتی 8ی حەسارۆك لە شاری هەولێر درا."
ئەوەش خراوەتە ڕوو، ئەو گوژمەیە لەسەر ڕێژەی 100%ی داهاتی زەویی ڕوكنی شارەوانییە لە سنووری سەرۆكایەتیی شارەوانیی هەولێر و بەپێی ڕێنوێنییەكانی دارایی تایبەت بە داهات، وەزارەتی شارەوانی و گەشتوگوزار فەرمانێكی وەزاری بۆ خەرجكردنی ئەو گوژمەیە دەركرد.
لە كابینەی نۆیەمی حكوومەتی هەرێمی كوردستاندا، مەسرور بارزانی، سەرۆكی حكوومەتی هەرێمی كوردستان بە شێوەیەكی مەیدانی سەردانی 8ی حەسارۆكی كرد و بڕیاری دا كە خزمەتگوزاری بگەیەندرێتە ئەو گەڕەكە، دواتر بە چەند قۆناغێك دەست بە جێبەجێكردنی پڕۆژەی خزمەتگوزاری كرا.
وەڵام بدەوه