مەكتەبی رێكخستنی پارێزگای كەركووك - گەرمیانی پارتی دیموكراتی كوردستان، راگەیەندراوێكی بڵاو كردەوە و لەمیانەدا وەڵامی قسەكانی ئەمڕۆی قەیس خەزعەلی، ئەمینداری عەسائیبی ئەهلی حەق دەداتەوە و دەڵێ ئەم قسانەی هەڵگری دەستكاریكردنی مێژوو و راستییەكانە.
لە راگەیەندراوەكەدا هاتووە "قسەكانی ئەمڕۆی قەیس خەز عەلی ئەمینداری عەسایبی ئەهلی حەق لە بانگەشەی هەڵبژاردنی ئەنجوومەنی پارێزگاكان لە كەركووك هەڵگری تەحریفی مێژوو و ڕاستیەکان بوو. ئەوە لە حاڵێكدایە ئەو دۆخەی كە بەسەر عێراق و كەركووك و هەرێمی كوردستاندا هاتووە، دەرئەنجامی سیاسەتی هەڵە و پێشێلكردنی دەستوور و تاییفەگەریی دەستەڵاتدارانی عێراقی بووە لە ساڵانی ڕابردوودا. سیاسەتێکی هەڵە کە وای كردووە لەبری ئەوەی عێراق ببێتە وڵاتی شەراكەت و برایەتی و پێشكەوتن، بووەتە شوێنی گەندەڵی و لاوازكردنی دامەزراوەكانی دەوڵەت و حوكمی میلیشیا و دەستوەردانی دەرەكی و تێكدانی بنەماكانی فیدڕاڵیزم و پێكەوەژیان و دیموكراسی."
مه‌كته‌بی رێكخستنی كه‌ركووك - گه‌رمیانی پارتی راشی ده‌گه‌یه‌نێت: "گەلی كوردستان بۆ بەدیهاتنی عێراقی تازە و جێگیربوونی فیدڕاڵیزم و دیموكراسی و شەراكەت دەریایەك خوێنی داوە. جینۆساید و كیمیاباران كراوە، گەلی كوردستان بەشداری سەرەكی بوو لە بنیاتنانی عێراق بەو ئومێدەی كە دەستەڵاتدارانی عێراق عیبرەت لە ڕابردوو وەربگرن و چیتر تەماحی ستەمكاری و شۆڤینیەت تووشی هەڵەیان نەكات، بە خەزعەلی دەڵێین ئێوە لەسەرشانی گەلی كوردستان و هەرێمی كوردستتان دەستتان لە دەستەڵاتدا گیر بوو، هەرێمی كوردستان فەزڵی بەسەر هەمووتانەوە هەیە كە ئێستا لە دەستەڵاتدان . بە قسەكانی ئێوە مێژوو چەواشە ناكرێت و هیچ كەسێك لەهەر پێگە و مەقامێكدا بێت ناتوانێ مێژووی خەبات و قوربانیدانی كوردستان بۆ ڕزگاریی عێراق بسڕێتەوە. هەرێمی كوردستان پشتی بە خوای گەورە و ئیرادەی ڕۆڵەكانی و ڕەوایەتیی دۆزەكەی گەرمە و بەرچاوی ڕوونە."
ئاماژەی بە ئەوەش داوە، بەبیریان دەهێنینەوە، دۆزی ڕەوای گەلی كوردستان دۆزێكی مێژوویی و جیۆگرافی و سیاسی و دەستووری و وجوودیە و لەبەرانبەر هیچ گوشار و نكۆڵیكارییەك بچووك ناكرێتەوە. خەڵكی كوردستان زۆر لەوە وریاتر و ئاگادارترن و چاك دەزانن سیاسەتی برسیکردن و بڕینی بودجەی هەرێمی كوردستان، دژایەتیکردنی ئاشکرای مافەكانی گەلی كوردستانە، ئەوە درێژكراوەی سیاسەتی نكۆڵیكارانەی ڕژێمەكانی پێشووترە.
لە راگەیەندراوەكەدا هاتووە "چیتان بۆ عێراق و عێراقییەكان كردووە؟ ئێوە بەرپرسی یەكەم و كۆتایی و هەموو نەهامەتی و ناسەقامگیری و برسیەتی و مەحروومییەتێكن كە لە سەرانسەری عێراقدا هەیە و دەتانەوێ هەرێمیش بەدەردی شوێنەكانی تر بەرن؟ هەر بەهۆی سیاسەتی فراوانخوازی و غرور و تایەفەگەریی ئێوەیە عێراق بووەتە سەرلیستی دەوڵەتە هەژار و گەندەڵەكانی جیهان و پاسپۆرتی عێراقی خەراپترین پاسپۆرتە لەسەر ئاستی جیهان. عێراق سەدان ملیار دۆلار داهاتی هەبووە كەچی هەژاری تەنگی بە پارێزگاكانی عێراق هەڵچنیوە و خەڵك لە باشوور ئاوی خواردنەوەی نییە و قوتابخانە و خەستەخانەكان وێرانن.
وەڵام بدەوه