دژەتیرۆری کوردستان ئاشکرای دەکات کە لە دوو هێرشی جیای درۆنی سوپای تورکیا بۆ سەر ئۆتۆمبێلی چەکدارانی پەکەکە بەرپرسێکی هەواڵگریی پەکەکە و چەکدارێکی دیکە کوژران، ژمارەیەک برینداریشی لێکەوتەوە.
ئەمڕۆ چوارشەممە 09ـی 08ـی 2023 دژەتیرۆری کوردستان زانیاریی لەبارەی دوو هێرشەکەی ئەمڕۆی سوپای تورکیا بڵاو کردەوە و ڕایگەیاند: لە دوو هێرشی جیای فڕۆکەی بێفڕۆکەوانی سوپای تورکیا بۆ سەر دوو ئۆتۆمبێلی چەکدارانی پەکەکە بەرپرسێکی ئەمنیی پەکەکە و چەکدارێک کوژران و چوار چەکداری دیکەش بریندار بوون.
سەبارەت بە هێرشی یەکەم باسی لەوە کرد کە کاتژمێر 13:00ـی ئەمڕۆ چوارشەممە فڕۆکەی بێفڕۆکەوانی سوپای تورکیا لەنزیک گوندی گەڵاڵە لە قەزای ماوەتی پارێزگای سلێمانی، ئۆتۆمبێلێکی چەکدارانی پەکەکەی کردە ئامانج و بەهۆیەوە بەرپرسێکی هەواڵگریی پەکەکە کوژراو و دوو چەکداری دیکەش بریندار بوون.
لەبارەی هێرشی دووەمیشیان کە بەپێی زانیارییەکانی دژەتیرۆری کوردستان لە کاتژمێر 15:30ـی ئەمڕۆ چوارشەممە ئەنجام دراوە و ئاماژەی بەوە داوە کە لە هێرشێکی دیکەی فڕۆکەی بێفڕۆکەوانی سوپای تورکیا بۆ سەر ئۆتۆمبێلێکی چەکدارانی پەکەکە لەنزیک گوندی قەڵاتی ناحییەی خەلەکانی سەر بە پارێزگای سلێمانی، چەکدارێکی پەکەکە کوژراو و دوو چەکداری دیکەش بریندار بوون.
وەڵام بدەوه