رۆژنامەنووسێكی ناسراوی عێراق ئاشكرای دەكات كە ئەگەر هەیە كۆمپانیای بەبازاڕكردنی نەوتی عێراق (سۆمۆ) هاوشێوەی هەموو ئەو كەس و بانك و دامەزراوانەی دیكەی عێراق كە لە لایەن ئەمریكاوە سزا دراون، سزای بخرێتە سەر، بەهۆی ئەوەی نەوتی ئێران بە ناوی عێراقەوە فرۆشراوە.
رۆژی پێنجشەممە ٣ی تەمووزی ٢٠٢٥، وەزارەتی گەنجینەی ئەمریكا پیاوێكی عێراقی كە هەڵگری رەگەزنامەی بەریتانیشە سزا دا، بەهۆی ئەوەی نەوتی ئێرانی تێكەڵ بە نەوتی عێراق كردووە و لە بازاڕەكانی نێودەوڵەتی فرۆشتوویەتیەوە.
لەمبارەیەوە هیشام عەلی كە چالاكێكی سیاسی و پێشكەشكاری بەرنامەیەكە لە كەناڵی (شەرقیە)ی عێراقی، لە پێگەی خۆی لە تۆڕی كۆمەڵایەتیی (فەیسبووك) بڵاوی كردەوە: ”وەزارەتی نەوت هەموو هێلكەكانی خۆی لە زەمبیلەی ئەو بزنسمانە داناوە كە چەندین ناوی هەیە و سزای بەسەردا سەپێندراوە.
ئەوەشی روونكردووەتەوە كە ئەو كەسە گرێبەستی لەگەڵ كۆمپانیایەكی گواستنەوەی یەكێك لە پێكهاتەكانی وەزارەتی نەوتی عێراق بۆ گواستنەوەی نەوتی عێراق كردووە، بەڵام لەبەر ئەوەی كۆمپانیاكەی بواری گواستنەوە لەم دواییانە رێككەوتنی لەگەڵ كۆمپانیای سۆمۆ كردووە لەسەر گواستنەوەی نەوت و كۆگاكردنی لە كۆڕنیشی ژمارە 41ی بەندەری فاو لە كاتێكدا ئەو كۆڕنیشەش موڵكی ئەو بازرگانە بووە كە سزا دراوە، بۆیە هەمان كەس، بەرپرس بووە لە گواستنەوە و كۆگاكردن لەسەر بنەمای ئەو رێككەوتنە.
هیشام عەلی دەڵێت: ”بەپێی ئەم زانیارییانەی سەرەوە، دەبینین كە وابەستەیی لە نێوان گرێبەستەكاندا هەیە، ئەمەش وادەكات كە كۆمپانیای سۆمۆ بەر سزاكان بكەوێت، لە كاتێكدا 350 ملیۆن دۆلاری وەزارەتی نەوتی عێراق لە ئەستۆی ئەو بازرگانەیە كە سزادراوە.“
ئەوەشی ئاشكرا كردووە كە ئەو بڕە پارە زۆرەی وەزارەتی نەوتی عێراق لەژێر هەڕەشەی سڕكردندایە.
هەر لەمبارەیەوە ستیڤن نەبیل، ڕۆژنامەنووس و چالاكی سیاسیی عێراقی لە پێگەی خۆی لە تۆڕی كۆمەڵایەتیی (فەیسبووك) رای گەیاند: ”وەزارەتی گەنجینەی ئەمریكا بە وردی ڕوونی كردووەتەوە كە چۆن ئەو بازرگانە سزادراوە ملیۆنەها دۆلاری بە بەرپرسان و پەرلەمانتارانی عێراقی داوە، بۆ ئەوەی پرۆسەی بەقاچاخبردنی نەوتی بۆ ئاسان بكەن و رەزامەندیی یاسایی پێ بدەن. تەنانەت ئەوەش خراوەتە ڕوو كە هەندێك بەرپرس بەڵگەنامەی ئەوەیان بۆ نەوتەكە دەركردووە كە نەوتی عێراقە، ئەمەش بە چاوپۆشین لەوەی نەوتی ئێرانە و بە ناوی عێراق دەفرۆشرێت.“
بە بڕوای ستیڤن نەبیل، ئەوەی كراوە ”كارەساتێكی زەبەلاحە و خیانەتكردنە لە وڵات و ئابووریی عێراق لەپێناو ئێران و دەربازكردنی لە سزاكان، ئەو عێراقەی كە پشت بە نەوت دەبەستێت. دەزانن قەبارەی ئەو دۆسیەیە چەند مەترسیدارە یان نا؟ ئەگەر سزا خرایە سەر هەناردەكردنی نەوتی عێراق بەهۆی ئەم جۆرە كەسانە و ئەوانەی پاڵپشتییان دەكەن، دۆخی عێراق و ئابوورییەكەی چی لێ دێت؟“
وەڵام بدەوه