هۆشداری واشنتۆن گەیشتە بەغدا

رۆژنامەیەكی بەناوبانگ ئاشكرای دەكات كە ئەمەریكا داوای لە عێراق كردووە سەرجەم ئیمتیازەكان لە حەشد ببڕن، خانوو و ئۆتۆمبێل لە سەركردەكانیان بستێننەوە و بودجەیان ببڕن.

ئەمڕۆ سێشەم 11ـی ئادار، رۆژنامەی عەرەب چاپی لەندەنی بڵاوی كردەوە، گوشارەكانی واشنتن بۆ سەر عێراق لەبارەی حەشدی شەعبییەوە بەردەوامییان هەیە، ئەمەریكا چەند هۆشدارییەكی بە سەركردەكانی حەشدی شەعبی داوە.

رۆژنامەكە ئاماژەی بەوە كردووە، لە ئاگاداركردنەوەكەی ئەمەریكا بۆ عێراقدا هاتووە، دەبێت حكوومەتەكەی سوودانی كار بۆ ئەوە بكات ئیمتیازەكانی بەرپرسانی حەشد ببڕێت، لەوانەش پێدانی بەنزین، وەرگرتنەوەی ئۆتۆمبێلی حكوومی و باڵەخانە و دامەزراوە حكوومییەكان لە بەرپرسانی حەشد.

ئەو رۆژنامەیە دەشڵێت، ئەمەریكا داوای كردووە بودجەی حەشد لە وەزارەتی بەرگری ببڕێت، لەگەڵ بڕینی هەموو جۆرە هاوكارییەكی حكوومی بۆ ئەو بەرپرسانە بەو مەبەستەی چالاكی و تواناكانیان كز بكات، نەتوانن سوود لە ئابووری عێراق وەربگرن و لە بەرژەوەندی ئێران و لە دژی ئەمەریكا و هاوپەیمانان بەكاری بهێنن.

ئەوە لە كاتێكدایە پێشتر ئەمەریكا چەند هۆشدارییەكی بە عێراق و بە دیاریكراوی بە سوودانی دا، لەبارەی هەڵوەشاندنەوەی حەشد و چەككردنی گرووپ و كۆمەڵە لە یاسا دەرچووەكان.