وەزارەتی ناوخۆی عێراق بڕیاری دا بردن و بەكارهێنانی مۆبایل لە شوێنی دەوام، لە ئەفسەر و كارمەندانی هێزەكانی ناوخۆ قەدەغە بكات.
ئەمڕۆ دووشەم 12ـی تشرینی دووەم، بەپێی نووسراوێك كە لەلایەن عەبدولئەمیر شەمەری وەزیری ناوخۆی عێراق واژوو كراوە و تێیدا هاتووە، ئەفسەران تا پلەی رائید و سەرجەم كارمەندانی هێزەكانی ئاسایشی ناوخۆ، نابێت مۆبایل ببەنە شوێنی دەوام و لە كاتی ئەركدا بەكاری بهێنن.
لە نووسراوەكەدا هاتووە، هەر ئەفسەر و كارمەندێك پێچەوانەی بڕیارەكە سەرپێچی بكات، رووبەڕووی سزا دەبێتەوە.
لەبارەی سزاكەش ئاماژە بۆ ئەوە كراوە، بۆ یەكەمجار بۆ ماوەی 30 رۆژ دەگیرێت، لە كاتی دووبارەكردنەوەشدا رەوانەی دادگای هێزەكانی ناوخۆ دەكرێت بۆ دادگاییكردنی.
تا ئێستە هۆكاری ئەو بڕیارەی وەزیری ناوخۆی عێراق روون نەبووەتە بۆچی دراوە، بەڵام میدیاكانی عێراق باس لەوە دەكەن، خراپیی كارەكان و ئاڵوگۆڕی نووسراوەكان لەڕێگەی سۆشیال میدیا و بڵاوكردنەوەیان هۆكارەكەیەتی.
وەڵام بدەوه