ئەمڕۆ یەكشەممە سەركردەی میلیشیای نوجەبای عێراق ئاشكرای كرد كە هێوركردنەوەی دۆخەكە و ڕاگرتنی هێرشەكانیان بۆ سەر هێزەكانی ئەمریكا كاتییە و بەم زووانە دەست پێ دەكەنەوە.
ئەكرەم كەعبی سەركردەی میلیشیای نوجەبای نزیك لە ئێران لە لێدوانێكدا ئاشكرای كرد كە ئەو هێوركردنەوە كاتییەی هەیە، تاكتیكە و بۆ ئەوەیانە هێزەكانی دووبارە ڕێك بخەنەوە و دابەشیان بكەنەوە.
دەشڵێ: "چەند ناپاك و بەكرێگیراوێك، وڵاتی خۆیان و دین و ویژدانیان بە داگیركەر فرۆشتووە و زانیارییان لەبارەی هێزەكانی بەرگری و پێگەكانمان بە داگیركەر داوە، بۆیە بە پێویستمان زانی دووبارە هێزەكانمان ڕێك بخەینەوە و گیانی برایەكانمان بپارێزین، بۆ ئەوەی سەرلەنوێ جارێكی تر بە شێوەیەكی نوێ هێزەكانمان بڵاو بكەینەوە".
جێی باسە ماوەی 20 رۆژ دەبێ میلیشیا عێراقییەكانی سەر بە ئێران هێرشەكانیان بۆ سەر هێزەكانی ئەمریكا لە عێراق و سووریا راگرتووە، ئەمەش دوای ئەوەی هێزەكانی ئەمریكا و هاوپەیمانان گورزی كەمەرشكێنیان لێ دان.
وەڵام بدەوه