ئێران داوایەکی بەپەلە دەکات

عەباس عێراقچی، وەزیری دەرەوەی ئێران ڕایگەیاند، هێرشەكانی سەر وڵاتەكەی پێشێلکردنی ئاشکرای یاسا نێودەوڵەتییەکانە و داوای هەڵوێستی دەستبەجێی لە  نەتەوە یەکگرتوەکان کرد، هەروەها دەشڵێت، "ئەمریکا و ئیسرائیل دەبێت قەرەبوی زیانی هێرشەکان بۆ سەر دامەزراوە ئەتۆمییەکانی ئێران بکەنەوە".
عەباس عێراقچی، لە نامەیەکدا بۆ سکرتێری گشتی و ئەندامانی ئەنجومەنی ئاسایشی نەتەوە یەکگرتوەکان، هێرشەکانی ئەم دواییەی ئەمریکا و ئیسرائیلی بۆ سەر ناوەندە ئەتۆمییەکانی ئێران بە پێشێلکردنی ئاشکرای یاسا نێودەوڵەتییەکان دانا و داوای هەڵوێستی دەستبەجێی ئەم دامەزراوەیەی کرد.
عێراقچی ڕایگەیاند، هێرشکردنە سەر دامەزراوە ئەتۆمییە ئاشتیخوازەکانی ئێران لە نەتەنز و نزیک وێستگەی بوشەهر، پێشێلکردنی پەیماننامەی نەتەوە یەکگرتوەکان، بڕیارنامەی ئاژانسی نێودەوڵەتیی وزەی ئەتۆم و بنەما چەسپاوەکانی یاسا نێودەوڵەتییەکانە.
جەختیکردەوە کە بە ئامانجگرتنی دامەزراوە ئەتۆمییەکان، دەکرێت ببێتە هۆی بڵاوبونەوەی بەرفراوانی ماددە ڕادیۆئەکتیڤەکان و لێکەوتەی زۆر مەترسیداری بۆ سەر خەڵک و ژینگە هەبێت.
عەباس عێراقیچی لە نامەكەیدا، هێرشەكانەی وەک نمونەی تاوانی جەنگ و دەستدرێژی بۆ سەر ئاشتی نێودەوڵەتی وەسف دەكات و داوای شەرمەزارکردنی دەستدرێژیکاران، ڕاگرتنی دەستبەجێی هێرشەکان و پێدانی قەرەبوی تەواوەتی دەكات.
عێراقچی هەروەها داوای لە ئەنجومەنی ئاسایش کرد کە ئیسرائیل ناچاربکات بە پەیوەندیکردن بە پەیماننامەی قەدەغەکردنی بڵاوبونەوەی چەکی ئەتۆمی (NPT) و خستنە ژێر چاودێریی دامەزراوە ئەتۆمییەکانی لەلایەن ئاژانسی نێودەوڵەتیی وزەی ئەتۆمیەوە.