زرغام مالیکی، پەرلەمانتاری هاوپەیمانیی دەوڵەتی یاسا بە سەرۆکایەتی نووری مالیکی، ئەمڕۆ (دووشەممە، 25-12-2023) راگەیاند، هاوپەیمانیی دەوڵەتی یاسا، پشتیوانی لە چارەسەرکردنی کێشەی مووچەی فەرمانبەرانی هەرێمی کوردستان دەکات، پێویستە ئەو کێشەیە لە ریشەوە چارەسەر بکرێت و لە هەموو جۆرە ململانێیەکی سیاسی دووربخرێتەوە.
پەرلەمانتارەکەی هاوپەیمانیی دەوڵەتی یاسا ئاماژەی بەوەکرد، بۆ چارەسەرکردنی کێشەی مووچەی فەرمانبەرانی کوردستان، دەوڵەتی یاسا دەنگ بە هەمواری یاسای بودجەی 2023، 2024 و 2025 دەدات.
یەکێک لەو بڕگانەی کە لیژنەکەی سەرۆکوەزیرانی عێراق بەنیازە هەمواری بکاتەوە، تێچووی بەرهەمهێنانی نەوتە لە هەرێمی کوردستان و رەنگە بکرێتە 21 دۆلار بۆ هەر بەرمیلێک نەوت. زرغام مالیکی، کە هاوکات ئەندامی لیژنەی نەوت و گازە لە پەرلەمانی عێراق رای جیاوازە و دەڵێت، "تێچووی دەرهێنانی نەوت لە عێراق جیاوازیی ئەوتۆی نییە، نابێت پارەکە زۆر بێت، ئەو کارەش ئەگەر بکرێت، دەبێت لیژنەیەکی پسپۆر هەڵسەنگاندنی بۆ بکات."
وەڵام بدەوه