پەیامێک لە مووقتەدا سەدرەوە

سەدر بۆ لایەنگرانی: هێرش مەکەنە سەر هەڵبژاردنە گەندەڵەكەیان

موقتەدا سەدر، رێبەری رەوتی سەدر لە تۆڕێ (X) پەیامێکی بڵاوکردەوە و بە لایەنگرانی دەڵێت، "ئێمە كەسانێكین خۆمان لە بەركەوتنی گەندەڵیی ئەوان و یاریی هەڵبژاردنەكەیان پاک رادەگرین، ئەوانیش كەسانێكن گەندەڵی دەكەن، خوداش گەندەڵکارانی خۆش ناوێت."

هەر لە پەیامەکەیدا سەدر داوا لە لایەنگرانی دەکات، "خۆتان پاک رابگرن و هێرش مەکەنە سەر هەڵبژاردنە گەندەڵەكەیان، پارێزگاری لە ئاسایش و سەقامگیریی عێراق و كەرامەتی غەزە بكەن، وەک چۆن میری ئیمانداران، (واتە عەلی كوری ئەبو تاڵیب)، لەدوای لێسەندنەوەی خەلافەتەكەی، پارێزگاری لە سەقامگیری كرد.

رێبەری رەوتی سەدر لە کۆتایی پەیامەکەیدا بە لایەنگرانی دەڵێت: عێراق و ئایین و مەزهەب لەئەستۆی ئێوەدایە.