دادگای فیدراڵیی عێراق بڕیارێكی دیكەی لە بەرژەوەندیی گرووپە وەلائییەكان دەركرد كە ئەویش ڕەتكردنەوەی داوایەكی لویس ساكۆیە.
بەپێی هەواڵی میدیاكانی عێراق، ئەمڕۆ پێنجشەممە 16ی 11ی 2023، دادگای فیدراڵیی عێراق داوایەكی كاردیناڵ لویس ڕۆفائیل ساكۆ، پاتریاركی كەنیسەی كلدانی لە عێراق و جیهان ڕەت كردەوە كە تایبەت بوو بەو پێشێلكارییانەی لە مەرسوومێكی كۆماریدا بە قازانجی ڕەیان كلدانی، فەرماندەی میلیشیای بابیلۆنی سەر بە حەشدی شەعبی كراوە.
ئەمە لە كاتێكدایە كە دوو ڕۆژ لەمەوبەر دادگای فیدراڵیی عێراق، محەمەد حەلبووسی، سەرۆكی ئەنجوومەنی نوێنەرانی عێراقی لە ئەندامێتیی پەرلەمانی عێراق خست، ئەمەش لە لایەن میدیاكانەوە بە بڕیارێك لە قازانجی گرووپە وەلائییەكان و لایەنەكانی نزیك لە ئێران لێك درایەوە.
مەرسوومەكەی سەركۆماری عێراق لە نیسانی ئەمساڵ دەر كراوە و بەهۆیەوە مەرسوومێكی ساڵی 2013ی سەركۆماری عێراق هەڵوەشێندراوەتەوە كە بەهۆیەوە لویس ساكۆ بە پاتریاركی كەنیسەی كلدانی دانراوە، بەڵام چاودێران جەختیان كردووەتەوە كە مەرسوومە تازەكە، لەپێناو ئەوەیە كەسانی سەر بە ڕەیان كلدانی لەو پۆستە دابنرێن، تاوەكوو بتوانن كەنیسەی كلدانی بخەنە خزمەتی بەرژەوەندیی گرووپە وەلائییەكان
وەڵام بدەوه