لەبارەی بەشەخۆراکی مانگانە سوودانی چی وت؟

 وەزیرانی عێراقی فیدراڵ جەخت دەكاتەوە كە دەبێت مادەکانی بەشەخۆراکی مانگانە، بەتایبەتی برنج و زەیت باش بکرێ.

بەپێی ڕاگەیاندراوێكی ئەنجوومەنی وەزیرانی عێراقی فیدراڵ، ئەمڕۆ یەکشەممە 5/11/2023، محەمەد شیاع سوودانی، سەرۆك وەزیرانی عێراقی فیدراڵ سەردانی وەزارەتی بازرگانیی کرد و لەگەڵ بەرپرسانی وەزارەتەکە کۆ بووەوە.

لە كۆبوونەوەكەدا سوودانی ڕایگەیاند: "دەبێت جۆری مادەکانی بەشەخۆراکی مانگانەی هاووڵاتییان باش بكرێت، بەتایبەتی برنج و زەیت.''

سەرۆك وەزیرانی عێراق داوای كردووە کۆتایی بەو ڕێكارە ئاڵۆزانە بهێندرێت كە بۆ تۆمارکردنی پسوولەی خۆراك و زیادکردن و سڕینەوەی ناو لەسەر پسوولەکە ڕووبەڕووی هاووڵاتییان دەبێتەوە و جەختی كردەوە: "دەبێت لە کاتی سەردانی هاووڵاتییان بۆ وەزارەتەکە کەرامەتیان بپارێزرێت و بێڕێزییان پێ نەكرێت.''

یەپێی ڕاگەیاندراوەكە، سەرۆك وەزیرانی عێراق ڕایگەیاندووە: "نابێت وەزارەتی بازرگانی تەنیا وەزارەتی پسووڵەی خۆراك و دابەشكردنی خۆراك بێت، بەڵکوو دەبێت ڕۆڵی خۆی لە چاکسازیی ئابووری و فەراهەمکردنی ژینگەی پێویست بۆ ڕاکێشانی وەبەرهێنان هەبێت.''