رۆژی یەکشەممە (24ـی ئەیلوولی 2023) عەلی عەلاق، پارێزگاری بانکی ناوەندیی عێراق رایگەیاند، بانکی ناوەندی هەوڵدەدات کەناڵی پەیوەندی راستەوخۆ بۆ بانکە عێراقییەکان لەگەڵ بانکە بیانییەکان بکاتەوە بۆ ئەنجامدانی ئاڵوگۆڕی بازرگانی و گواستنەوەی دراو.
پارێزگاری بانکی ناوەندیی عێراق ئاشکرایکرد، ساڵی داهاتوو سەرجەم مامەڵە بازرگانییە ناوخۆییەکان و مامەڵە بازرگانییەکانی دیکە سنووردار دەکەن بە مامەڵەکردن بە دینار لە بری دۆلار.
هاوکات عەلی عەلاق ئاماژەی بەوەشکرد، دەرفەتیان بۆ زۆربەی بازرگانەکان رەخساندووە و لە کەناڵە فەرمییەکانی گواستنەوەی دراوەوە دۆلاریان بە نرخی (1320) دینار بۆ دابینکراوە و روونیکردەوە، سیستمی نوێی گواستنەوەی دەرەکی و فرۆشتنی دۆلار مەترسی هەموو لایەنەکانی پرۆسەکە دەپارێزێت.
ئەم رێکارە نوێیەی بانکی ناوەندیی عێراق دوای ئەوە دێت، رۆژی 15ـی ئەم مانگە، وەزارەتی گەنجینەی ئەمەریکا رایگەیاند، لەگەڵ عێراق رێککەوتوون کار بۆ باشترکردنی کەرتی دارایی بکەین لەپێناو رێگرکردن لە ساختەکاری و خۆدزینەوە لە سزاکان و پارەدارکردنی تیرۆر و چالاکییە نایاساییەکانی دیکە.
ئەو راگەیەندراوەی وەزارەتی گەنجینەی ئەمەریکا دوای سەردانی ئێلیزابێس رۆزنبێرگ یاریدەدەری وەزیری گەنجینەی ئەمریکا لە 12 و 13ـی ئەم مانگە هات بۆ بەغدا و لەگەڵ سەرۆکوەزیرانی عێراق، بانکی ناوەندی و نوێنەرانی بانکەکانی کەرتی تایبەتی عێراق کۆبووەتەوە و ئاماژەیان بەوەشکردووە، رێککەوتوون لەسەر کارکردنی پێکەوەیی و هەنگاونان بۆ کاری پێکەوەیی بۆ ئەنجامدانی چاکسازی بەردەوام، بۆ ئەوەی عێراق بگاتە ئاستی ستانداردە نێودەوڵەتییەکان و رێگری بکات لە ساختەکاری و خۆدزینەوە لە سزاکان و پارەدارکردنی تیرۆر و چالاکییە نایاساییەکانی دیکە.
وەڵام بدەوه