سەرۆکی نوێنەرایەتی حکوومەتی ھەرێمی کوردستان لە بەغدا ئاشکرایکرد، حکوومەتی عێراق بڕیاریداوە 400 ملیار دینار بۆ ھەرێمی کوردستان بنێرێت و ئەم ھەفتەیە ئەو بڕە پارەیە ڕەوانەی ھەرێمی کوردستان دەکرێت.
فارس عیسا، سەرۆکی نوێنەرایەتی حکوومەتی ھەرێمی کوردستان لە بەغدا، ڕایگەیاند: "حکوومەتی عێراق بڕیاریداوە کە 400 ملیار دینار مانگانە بۆ مووچەی فەرمانبەرانی ھەرێمی کوردستان بنێرێت و بڕیارەکەش دەرچووە و تەنھا ماوە پارەکە ڕەوانەی ھەرێمی کوردستان بکرێت".
فارس عیسا جەختیشی کردەوە: "بڕیارە ئەم ھەفتەیە حکوومەتی عێراق ئەو 400 ملیار دینارە بۆ ھەرێمی کوردستان بنێرێت".
ئەمەش لەکاتێکدایە، ڕۆژی پێنج شەممە سەرۆکوەزیرانی عێراق جارێکی دیکە جەختی لەوەکردووەتەوە، کە ئەرکی ئەوانە مووچەی فەرمانبەرانی ھەرێمی کوردستان دابین بکەن و ئەو ئەرکەی خۆیان جێبەجێ دەکەن، بۆیە بڕیارە تا پڕۆژە یاسایی بوودجەی گشتی عێراق پەسەند دەکرێت مانگانە حکوومەتی عێراق 400 ملیار دینار بۆ ھەرێمی کوردستان بۆ مووچە ڕەوانە بکات، کە ئێستا بوودجە لە پەرلەمانە و خوێندنەوەی دووەمیشی بۆ کراوە و تەنھا ماوە دەنگی لەسەر بدرێت و پەسەند بکرێت.
وەڵام بدەوه