دۆلار بە نرخی 132 هەزار دەدرێتە ئەم کەسانە

بانکی ناوەندی دۆلار بە نرخی ١٣٢ هەزار دینار دەداتە بازرگانان
بانکی ناوەندیی عێراق داوا لەو کۆمپانیا و بازرگانانە دەکات کە پێش حەوتی ئەم مانگە بۆ هاوردەکردنی کاڵا داوای دۆلاریان کردووە سەردانی بکەن، بۆ ئەوەی دۆلاریان بە نرخی پێشوو و بە ١٣٢ هەزار دینار بۆ هەر ١٠٠ دۆلارێک لەبری ١٥٢ هەزار دینار بۆ دابین بکرێت. 
سیروان محەممەد، بازرگان لە سلێمانی ڕایگەیاند، کە ئەم هەنگاوە بۆ قەرەبووکردنەوەی ئەو بازرگانانەیە کە بەهۆی دواکەوتنی حەواڵەکان و ڕاگرتنی کاڵاکانیان لە بەندەری عەقەبە تووشی زیانی دارایی و پێبژاردن بوونەتەوە.
لە لایەکی ترەوە، بانکی ناوەندی جەختی لەوە کردووەتەوە کە بەدواداچوون بۆ تەواوی ئەو مامەڵە بانکییانە دەکات کە پێش گۆڕینی بەهای ئاڵوگۆڕی دراو کراون، و چاودێریی هەر دواکەوتنێک لە حەواڵەکردنی دۆلاردا دەکات. 
لەگەڵ ئەوەشدا، ئەو بازرگانەی سلێمانی هۆشداریی دا کە بەهۆی گۆڕانکاری لە بەهای دینار و باجی گومرگی، نرخ و پێداویستییەکان بە ڕێژەی ١٨٪ لەسەر هاووڵاتییان گرانتر دەبن و هەر کاڵایەک لە پاش حەوتی مانگەوە داخل بکرێت ئەو زێدەبەهایەی دەچێتە سەر.