وەزیری دارایی عێراق هاتە دەنگ

فالح ساری، وەزیری دارایی عێراق پلانی هەیە ڕێکارەکانی ناردنی مووچەی هەرێمی کوردستان بگۆڕێت و وتوویەتی وەکو تەیف سامی ناکەم و بۆ ناردنی مووچە چاوەڕێی ناردنی داهاتی ناوخۆی هەرێمی کوردستان ناکەم.
 فالح ساری بەنیازە ڕێکارەکانی ناردنی مووچەی هەرێمی کوردستان بگۆڕێت و لەگەڵ دابەشکردنی مووچەی فەرمانبەرانی عێراق، مووچەی هەرێمی کوردستانیش بنێرێت. پێشتر تەیف سامی، وەزیری پێشووی دارایی عێراق، بۆ ناردنی مووچە مەرجی ئەوەی دانابوو، حکومەتی هەرێمی کوردستان داهاتی نانەوتی بنێرێت ئەوکاتە لە بەغدا ڕێکارەکانی ناردنی مووچە دەستی پێدەکرد، بەڵام فالح ساری وتویەتی، من وەکو تەیف سامی ناکەم، داهاتی نانەوتی ناکەم بە ڕێگر لەبەردەم ناردنی مووچە، یەکێک لە بژاردەکانی بەردەستمان ئەوەیە، مووچە دەنێرین و دواتر داهاتی نانەوتی لە هەرێمی کوردستان وەردەگرین و حساباتی خۆمان دەکەین، ئەمەش بۆ ئەوەی مووچەی فەرمانبەرانی هەرێمی کوردستان دوانەکەوێت. وەزارەتی دارایی و ئابووریی هەرێمی کوردستان ڕایگەیاند، تیمی تەکنیکیی وەزارەت سەرجەم کارەکانی تەواو کردووە و ئەمشەو لیستی مووچەی مانگی پێنجی فەرمانبەران و مووچەخۆرانی هەرێمی کوردستان، لەگەڵ ڕاپۆرتی تەرازووی پێداچوونەوەی مانگی نیسان، ڕەوانەی بەغدا دەکرێن و سبەی پێنجشەممە تەواوی لیست و داتاکان ڕادەستی فەرمانگەی ژمێریاریی وەزارەتی دارایی عێراق دەکەن، بە مەبەستی دەستپێکردنی پڕۆسەی وردبینی و ناردنی تەمویلی مووچە. سەبارەت بە دیاریکردنی داهاتی نانەوتیی مانگی پێنج و ناردنی پشکی بەغدا، وەزارەتی دارایی، ڕایگەیاند: لە ڕووی ژمێریارییەوە، ئەو بابەتە بە تەواوی پەیوەستە بە ڕاپۆرتی تەرازووی پێداچوونەوەی مانگانە، تاوەکو کۆتایی مانگی پێنج و ناردنی سەرجەم داتاکان لە یەکە ژمێریارییەکانەوە بۆ بەڕێوەبەرایەتیی گشتیی ژمێریاری، بە تەواوی دیار نابێت کە داهاتی ئەم مانگە چەندە و پشکی حکومەتی فیدراڵیش چەند دەبێت.