دوای بڕیاری سەرۆکوەزیران مەسرور بارزانی سەبارەت بە ئاسانکاری لە دەروازەکان بۆ هاوردەکردنی ئاژەڵ لە دەرەوەی وڵات، گۆشتی سوور لە بازارەکانی هەرێمی کوردستان دابەزیوە.
لە ڕێکەوتی 27- 3- 2024 سەرۆکوەزیران مەسرور بارزانی بڕیاریدا بە بەخشینی 50٪ گومرک لەسەر هاوردەکردنی ئاژەڵ، مەبەستی دابەزینی نرخی گۆشت لە بازارەکان، ئەمەش وای کرد نرخی گۆشت نزیکەی سێ هەزار تا دوو هەزار دینار دابەزێت.
فیراس سەدیق، بەڕێوەبەری سامانی ئاژەڵ لە وەزارەتی کشتوکاڵ ڕاگەیاند: دوای بڕیاری سەرۆکوەزیران لەسەر بەخشینی گومرک بۆ هاوردەکردنی ئاژەڵ، کاریگەری لەسەر نرخی گۆشت دروستکرد، بەڵام بەشێک لە گۆشتفرۆشەکان پابەند نەبوون بە دابەزاندنی نرخ، بۆیە کاریگەری ڕاستەوخۆی نەبوو، بەڵام دوای چاودێریکردن لەلایەن تیمەکان چاودێری بازرگانی پارێزگای هەولێرگۆشتفرۆشەکان پابەند کران بە دابەزاندنی نرخی گۆشت، ئێستا بە گشتیی نرخی گۆشت بە زیندویی بە حەوت هەزار تا شەش هەزار دینارە.
ئەو ئاژەڵەی دێتە بازارەکانی هەرێمی کوردستان، هەمان ئاژەڵە دەچێت بۆ مووسڵ، بەڵام نرخی گۆشت لە مووسڵ هەرزانترە لە هەولێر. فراس سەدیق، لەوبارەیەوە دەڵێت، ئەمە دەگەڕێتەوە سەر ویژدانی گۆشتفرۆشەکان، چونکە ئەوەی ئێمە تێبینێمان کردووە گۆشتفرۆشەکانی هەولێر بە قازانجی کەم ڕازی نین بۆیە جیاوازی لە نرخەکان هەیە.
هۆگر عەلی، بەڕێوەبەری چاودێریی بازرگانیی هەولێر ڕاگەیاند: لە ماوەی یەک ساڵی ڕابردوو سەردانی هەزار و 935 گۆشتفرۆشمان کردووە، هاوکات 239 گوشتفرۆش سزادراون، کە بەشێکی زۆریان پابەندی نرخ نەبوون.
نرخی گۆشتی نەرمە لە هەولێر بە 17 بۆ 16 هەزار دینارە، کە پێشتر بە 21 بۆ 20 هەزار دینار بوو.
وەڵام بدەوه