ئەمڕۆ هەینی 31/5/2024، وەزارەتی دارایی و ئابووری ڕاگەیاندراوێكی بڵاو كردووەتەوە، تێیدا هاتووە: "ڕۆژی پێنجشەممە 30/5/2024، لە چوارچێوەی پرۆسەی بەبانکیکردنی مووچەی فەرمانبەرانی هەرێمی کوردستان لە ڕێگای پرۆژەی هەژماری من، بە پشتبەستن بە ڕێکكەوتنی نێوان وەزارەتی دارایی و ئابووری لەگەڵ بانکی عێراقی بۆ بازرگانی (TBI)، بۆ ناردنی زانیاریی فەرمانبەرانی حکوومەتی هەرێمی کوردستان، بۆ سێیەمین هەفتە لەسەریەک، وەزارەتی دارایی و ئابووری زانیاریی 2 هەزار و 557 فەرمانبەری سەرجەم وەزارەتەکانی هەرێمی کوردستانی نارد.
ئەوەش خراوەتە ڕوو، لە چوارچێوەی ڕێكکەوتنی نێوان وەزارەتی دارایی و ئابووریی حکوومەتی هەرێمی کوردستان و بانکی عێراقی بۆ بازرگانی (TBI)، وەزارەتی دارایی بەردەوام دەبێت لە ئامادەکردنی لیست و زانیاریی مووچەخۆران، کە ئەم بانکە لەنێوان حەوت بانکەکانی ناو پرۆژەی هەژماری من هەڵدەبژێرن، بەپێی ئەو پرۆسەیەی کە بانکی ناوەندیی عێراق پەسەندی کردووە و هەفتانە لیستی نوێ بۆ بانکەکە ئامادە دەکات.
وەزارەتی دارایی لە ڕاگەیاندراوەكەدا باسی لەوەش كردووە، لە ماوەی سێ هەفتەی ڕابردوودا، وەزارەتی دارایی و ئابووری داتا و زانیاری بە سێ لیست بۆ بانکی عێراقی بۆ بازرگانی (TBI) ناردووە، لیستی یەکەم 368 فەرمانبەر، لیستی دووەم 453 فەرمانبەر و لیستی سێیەم 2 هەزار و 557 فەرمانبەر بوون، تا ئێستا کۆی گشتیی داتا و زانیاریی 3 هەزار و 378 فەرمانبەری حکوومەتی هەرێمی کوردستان بۆ بانکی عێراقی بۆ بازرگانی (TBI) نێردراوە.
ڕوونیش كراوەتەوە: "وەك وەزارەتی دارایی و ئابووری چاوەڕوانین بانکی عێراقی بۆ بازرگانی (TBI) بە زووترین کات دەست بە کردنەوەی هەژماری بانکی بۆ فەرمانبەرانی خوازیار بکات و قۆناغ بە قۆناغ کارتی بانکی بۆ فەرمانبەران و مووچەخۆرانی هەرێمی کوردستان بگەڕێنێتەوە.
وەڵام بدەوه