کەشتیەکی هێرشبەری گەیشتە ناوچەکە

ڕۆژنامەی "ستارز ئەند سترایپس"ـی ئەمریکی بڵاویکردەوە، کەشتی هێرشبەری ئاویی-وشکانیی (یو ئێس ئێس بۆکسەر)ی ئەمریکی، کە هێزێکی مارینزی لەسەرە، گەیشتووەتە ڕۆژهەڵاتی ناوەڕاست. ئەمەش وەک بەشێک لە بەهێزکردنی ئامادەیی سەربازیی واشنتن لە ناوچەکە، هاوکات لەگەڵ بەڕێوەچوونی دانوستانەکان لەگەڵ ئێران.
بەپێی ڕۆژنامەکە، ئەم کەشتییە دەچێتە پاڵ هێزێکی گەورەی دەریایی ئەمریکا لە ناوچەکە کە پێکهاتووە لە دوو کەشتیی فڕۆکەهەڵگر، زیاتر لە ١٥ وێرانکەر و چەندین کەشتیی جەنگیی دیکە، کە ئەمەش بە یەکێک لە گەورەترین پرۆسەکانی بڵاوەپێکردنی هێزە دەریاییەکانی ئەمریکا دادەنرێت لە ڕۆژهەڵاتی ناوەڕاستدا لە ساڵانی ڕابردوودا.
ناردنی ئەم هێزە سەربازییە لە کاتێکدایە کە قەتەر میوانداری خولێکی نوێی گفتوگۆکانی نێوان ئەمریکا و ئێران دەکات، لە هەمان کاتیشدا واشنتن پارێزگاری لە ئامادەییەکی چڕی سەربازی دەکات لە کەنداودا، بەهۆی بەردەوامیی گرژییەکان لە گەرووی هورمز.
ڕۆژنامەی ستارز ئەند سترایپس، کە لەلایەن سوپای ئەمریکاوە لە دەرەوەی وڵات دەردەچێت، ئاماژەی بەوەشکردووە کە ئەم بڵاوەپێکردنە ڕەنگدانەوەی ستراتیژیی ئەمریکایە کە هەردوو ڕێڕەوی دیپلۆماسی و بەهێزکردنی بەرپەرچدانەوەی سەربازیی پێکەوە گرێداوە، هەروەها بە کراوەیی هێشتنەوەی بژاردەکانی جووڵەکردن لە ئەگەری شکستهێنانی دانوستانەکان یان هەڵکشانی گرژییەکان لە ناوچەکەدا.