وەزیری جەنگی ئەمریکا کۆتا پەیامی ئاراستەی ئێران کرد

دۆناڵد ترەمپ نایەوێ ڕێگەی جەنگ لەگەڵ ئێران بگرێتە بەر"

وەزیری جەنگی ئەمەریكا پەیامێكی ئاڕاستەی بەرپرسانی باڵای ئێران كرد و ڕایگەیاند، كە یەک بژاردەیان لەبەردەمە، ئەویش یان ڕێككەوتن یاخود هیچ. 

ئەمڕۆ دووشەممە 2ـی 2ـی 2026، پیت هێگسەس، وەزیری جەنگی ئەمەریكا، لە پرێس كۆنفڕانسێكی ڕۆژنامەنووسیدا، ڕایگەیاند: "دۆناڵد ترەمپ سەرۆكی ئەمریكا نایەوێت رێگەی جەنگ لەگەڵ ئێران بگرێتە بەر، بەڵام پێویستە ئامادەكاری بكەن و بۆ ئەم مەبەستەش بە تەواوی ئامادەین." 

وەزیری جەنگی ئەمەریكا، لە قسەكانیدا، پەیامێکی ئاڕاستەی بەرپرسانی ئێران كرد و ڕایگەیاند: "پێویستە هەر ئێستا دەست بە گفتوگۆ بكەن، بەپێچەوانەوە ئێمە بژاردەی دیكەمان دەبێت." 

ڕاشیگەیاند: "دۆناڵد ترەمپ ئامادەیە ڕێككەوتنی ئاشتی بكات ئەگەر ئێرانییەكان بەڕاستی ئەمەیان بوێت." 

پیت هێگسەس جەختی لەوەش كردەوە كە ئێران تەنیا یەک بژاردەی لەبەردەمە، ئەویش یان ڕێككەوتن و گفتوگۆیە، یاخود هیچ.