لە سەرەتای ئەم مانگە دۆناڵد ترەمپ رسووماتی گومرگی لەسەر كاڵا هاوردەكراوەكانی بۆ ئەمەریكا لەسەر دەیان وڵاتی دنیا زیاد كرد، ئەوەش بۆ پاڵپشتیكردنی بەرهەمی ناوخۆیی و چاوخشاندنەوە بە رسووماتی بازرگانیی لەگەڵ ئەو وڵاتانە، بەتایبەتی لەگەڵ چین، رۆژنامەیەكی ئەمەریكی باسی ئەوە دەكات ترەمپ بڕیاری سەپاندنی رسووماتی زیاتری گومرگی هەڵپەساردووە.
رۆژنامەی "وۆڵ ستریت جۆرناڵ"، بڵاو كردەوە كە ترەمپ ئەو بڕیارەی لە دوای كۆبوونەوە و راوێژكردن لەگەڵ سكۆت بیسیت وەزیری دارایی و هوارد لۆریتك وەزیری بازرگانی داوە، كاتێك هەردوو وەزیر توانیویانە قەناعەت بە ترەمپ بكەن بە پێویستیی وەستانی هەندێك لە زیادكردنەكە و راگەیاندنی ئەو بڕیارە بەخێرایی بۆ هێوركردنەوەی بازاڕە داراییەكان.
رۆژنامەكە باسی ئەوە دەكات هەردوو وەزیر سوودیان لە ئامادەنەبوونی پیتەر ناڤارۆ راوێژكاری بازرگانی نێودەوڵەتیی ترەمپ بینی، كە پاڵپشتی لە بیرۆكەی سەپاندنی رسووماتی زیاتری گومرگی لەسەر وڵاتانی تریش دەكات، ئەو ئامادەی دیدارەكە نەبووە و هەردوو وەزیر پێشنیازی خۆیان خستووەتە روو و ئاراستەی بڕیارەكەی ترەمپیان گۆڕیوە.
شایەنی باسە ترەمپ لە دووی ئەم مانگە واژووی لەسەر فەرمانێك كرد بە سەپاندنی رسووماتی زیاتری گومرگی بە رێژەی جیاواز بەسەر كاڵاكانی هاوردەكراو لە دەیان دەوڵەتی دنیا، بڕیارەكە لە نۆی ئەم مانگە جێبەجێ كرا، دواتر ترەمپ بڕیارەكەی رێك خستەوە، بەتایبەتی بەرانبەر بەو وڵاتانەی داوای گفتوگۆی بازرگانیان لە ئەمەریكا كرد، بە سەپاندنی زیادەی رسوومات بە رێژەی 10% بۆ ماوەی 90 رۆژ جگە لە چین.
وەڵام بدەوه