وەزیری بەرگریی ئەمریكا: ئامادەین زەبری توند لە ئێران بدەین

كەناڵی (ئەلعەرەبییە) بڵاوی كردووەتەوە، شرۆڤەکاران دەڵێن ڕەنگە ئێران چەند هەفتەیەکی مابێت بۆ بەرهەمهێنانی چەکی ئەتۆمی، سەرەڕای نكۆڵیی تاران لە دروستکردنی ئەو جۆرە چەکە.
ئەمڕۆ یەکشەممە، پیت هێگسس، وەزیری بەرگریی ئەمریکا ڕایگەیاند، ئەمریکا هیوای چارەسەرێکی دیپلۆماسیی هەیە بۆ ئەوەی ئێران نەتوانێت چەکی ئەتۆمی دروست بکات و ئەگەر ئەو کارە شکستی هێنا، ئەوا سوپای ئەمریکا ئامادەیە "زەبری توند لە قووڵایی ئێران بدات."
دیپلۆماتکارانی ئەمریکا و ئێران ڕۆژی شەممە لە عومان دەستیان بە دانوستان کرد بۆ کەمکردنەوەی نیگەرانییەکانی ڕۆژئاوا سەبارەت بە بەرنامە ئەتۆمییەکەی ئێران.
وەزیری بەرگری ڕایگەیاندووە: "هەرچەندە دۆناڵد ترەمپ هیوادارە ناچار نەبێت پەنا بۆ کردەوەی سەربازی ببات، بەڵام ئێمە گەر ناچار بكرێین، گورزی سەربازی بەكار دەهێنین، ئێران ئەگەر دەیەوێ هەمان چارەنووسی حووسیەکانی نەبێت، دەبێ بە دانوستان پرۆگرامە ئەتۆمیەکەی هەڵوەشێنێتەوە."
ناوبراو زیادی کرد: جەخت لەوە دەکەمەوە کە ئێمە نامانەوێت ئەوە بکەین، بەڵام ئەگەر ناچار بین ئەوە دەکەین، بۆ ئەوەی ئێران نەتوانێت بۆمبی ئەتۆمی بەدەست بهێنێت.
دۆناڵد ترەمپ، ڕۆژی چوارشەممە ڕایگەیاند، ئەگەر دانوستانەکانی عەممان شکست بهێنن، بە هاوکاریی ئیسرائیل، ئەگەر هەیە هێرشی سەربازی بۆ سەر ئێران بكەن