وەزیری دەرەوەی ئەمریكا ترەمپ لە نزیکەوە چاودێریی دۆخی ئێران دەکات

وەزیری دەرەوەی ئەمریكا ڕایگەیاند، وڵاتەكەی ڕێگە بە ئێران نادات چەکی ئەتۆمی بەدەستبهێنێت و ئەمریكا پابەندە بە ڕێگریكردن لە تاران بەمەبەستی پەرەپێدانی چەكی ئەتۆمی، دەشڵێت، "دۆناڵد ترەمپ، سەرۆكی ئەمریكا لە نزیکەوە چاودێریی ئەم پرسە دەکات".

مارکۆ ڕوبیۆ، وەزیری دەرەوەی ئەمریکا ئەمڕۆ شەممە لەکاتی بەشداریکردنی لە کۆبونەوەی وەزیرانی دەرەوەی ناتۆ لە برۆکسل ڕایگەیاند، وڵاتەكەی ڕێگە بە ئێران نادات ببێتە خاوەن چەکی ئەتۆمی. ئەمریكا پابەند دەبێت بە ڕێگریی لە تاران بۆ ئەوەی پەرە بە چەکی ئەتۆمی بدات

دەشڵێت، دۆناڵد ترەمپ، سەرۆكی ئەمریكا لە نزیکەوە چاودێریی ئەو پرسە دەکات و بەوپەڕی خۆشحاڵییەوە چاوەڕێی هەنگاوەکانی داهاتو دەکات.

ڕوبیۆ ئاماژەی بەوەشکرد، هیچ وڵاتێک لە جیهاندا نایەوێت ئێران ببێتە خاوەن چەکی ئەتۆمی، ئەوەش ئاماژەیە بۆ ئەوەی واشنتن بەردەوام دەبێت لە هەوڵە دیپلۆماسییەکانی بۆ دڵنیابون لەوەی تاران نەتوانێت بەو ئامانجەی بگات.

ئەوە لەكاتێكدایە کە دۆناڵد ترەمپ، سەرۆکی ئەمریکا کە پێشتر داوای لە تاران کردبو کە گفتوگۆی ڕاستەوخۆ بکات سەبارەت بە بەرنامە ئەتۆمییەکەی، هەڕەشەی بۆردومانکردنی ئێرانی کردبو، ئەگەر هەوڵە دیپلۆماسییەکان شکست بێنن.

ئێران ئامادەیی خۆی بۆ گفتوگۆ دەردەبڕێت، بەڵام ڕەتیدەکاتەوە لەژێر هەڕەشە یان فشاردا گفتوگۆی ڕاستەوخۆ ئەنجامبدات. ڕۆژی پێنجشەممەش ترەمپ ڕایگەیاند کە پێی باشترە "دانوستانی ڕاستەوخۆ" لەگەڵ ئێران ئەنجام بدات.

ناوبراو بە ڕۆژنامەنوسانی وت، "پێموایە دانوستانی ڕاستەوخۆ ئەنجام بدرێت باشترە. خێراترە و دەتوانیت باشتر لە لایەنی بەرامبەر تێبگەیت وەک لەوەی کە نێوەندگرەکان بەکاردەهێنیت".

لایخۆیەوە مەسعود پزیشكیان، سەرۆك كۆماری ئێران ئەمڕۆ ڕایگەیاند، وڵاتەکەی ئامادەیە "لە ئاستێکی یەکساندا" لەگەڵ ئەمریکا گفتوگۆ بکات، بەبێ ئەوەی دیاری بکات کە ئایا تاران بەشداری وتوێژی ڕاستەوخۆ دەکات یان نا