ئەمریكا و ئیسرائیل گورزی گەورە لە ئێران دەوەشێنن

 رۆژنامەی دەیلی ئێكسپرێس، لە سەرچاوەیەكی نزیك لە ئیدارەی ترەمپ بڵاوی كردەوە، كە ئەگەر ئێران پابەند نەبێ بە داواكارییەكانی ئەمریكا بۆ ڕاگرتنی هەوڵەكانی بۆ دروستكردنی چەكی ئەتۆمی، تا مانگی ئەیلوول لەنێو دەچێت.
رۆژنامەكە لە زاری سەرچاوەكەوە باسی لەوە كردووە: نیازەكە ڕوونە و ئاسان لێی تێدەگەیت، كاتی ئێران كۆتایی دێت.
هەروەها باسی لەوەش كردووە: گەر تاران بە دەم داواكەی دۆناڵد ترەمپ، سەرۆكی ئەمریكاوە نەچێ، كە داوای كرد بە تەواوی پێداچوونەوە بە توانا ئەتۆمییەكانیدا بكات و هەمووی هەڵوەشێنێتەوە، ئەوە تا مانگی ئەیلوول ئێران نامێنێ.
سەرچاوەیەكیش لە حكوومەتی ئیسرائیل ڕایگەیاندووە: ئەمریكا و ئیسرائیل گورزی گەورە لە وێستگە و دامەزراوە ئەتۆمییەكانی ئێران دەوەشێنن، ئەگەر ئێران نەیاتە ژێر باری دانوستانی چەكی ئەتۆمی.
ئەوەشی خستووەتە ڕوو، كە كارەكە دڵنیایە و گورزەكە دەوەشێندرێ، ئەگەر ئێران ڕەتی بكاتەوە هەڵوێستی خۆی لە ناوەڕۆك و ڕیشەوە بگۆڕێ.
لە كاتێكدا ترەمپ داوای كردووە گفتوگۆی ڕاستەوخۆ لەبارەی چەكی ئەتۆمیی ئێرانەوە بكرێ، بەڵام ئێران تەنیا ڕەزامەندیی لەسەر ئەوە داوە بەنێوەندگیریی عومان ئەو گفتوگۆیانە بكرێن.
سایتی ئەكسیۆس لە زاری بەرپرسانی ئەمریكاوە بڵاویان كردەوە: كۆشكی سپی، تاوتوێی پێشنیازی ئێران بۆ گفتوگۆی ناڕاستەوخۆ لەسەر بەرنامە ئەتۆمییەكەی دەكا، ئەمە لە كاتێكدایە ئەمریكا هێزەكانی لە ڕۆژهەڵاتی ناوەڕاست زیاتر و بەهێزتر دەكات.
بەرپرسێكی ئەمریكی بەو پێگە مێدیاییەی ڕاگەیاندووە: ئیدارەی ترەمپ پێی وایە گفتوگۆی ڕاستەوخۆ، هەلی سەركەوتنی زیاترە، بەڵام بە دووری نەزانی ئەو كارەش بكرێ كە عومان ببێتە نێوەندگیری گفتوگۆكان، وەك پێشتریش كراوە.
ترەمپ چەند جارێك دووپاتی كردووەتەوە كە باشترە بگەنە ڕێككەوتن، لە 30ی ئاداریش ڕایگەیاند كە لە ماوەی دوو هەفتەدا سزای لاوەكی بەسەر ئێراندا دەسەپێنێ، ئەگەر پێشكەوتن لە دانوستانی بەرنامەی ئەتۆمیی ئێران نەیاتە دی، هەڕەشەی ئەوەشی كرد، ئەگەر ئێران ڕەتی بكاتەوە بگاتە هیچ ڕێككەوتنیك، ڕووبەڕووی مووشەكبارانی كەموێنە دەبێتەوە.
لای خۆیەوە عەلی خامنەیی، ڕێبەری باڵای ئێران، لە وەڵامی ئەو هەڕەشانەدا، رایگەیاند: پێمان وا نییە كە ئەمریكا دەستوەردانی سەربازی بكا، بەڵام گەر ئەمریكا هەوڵی هاندانی یاخبوونی ناوخۆیی بدا، ڕووبەڕووی وەڵامێكی كوشندە دەبێتەوە.