ئێستە ئەمەریكا گوشارێكی گەورەی خستووەتە سەر تاران بۆ دەست پێكردنی گفتوگۆ و گەیشتن بە رێككەوتنێكی نوێ سەبارەت بە بەرنامە ئەتۆمییەكەی، ئەمەریكا بە هیچ شێوەیەك رێگە نادات تاران دەستی بە بۆمبی ئەتۆمی بگات، لەو ناوەدا ئیسرائیل هەڕەشە دەكات بەوەی خۆی بۆ گورزێكی گەورە بۆ ئێران ئامادە كردووە كە رەنگە رژێمەكەی برووخێنێت.
وەك بڵێی دۆخەكە بەسەر رژێمی ئێران و بەرەی موقاوەمەت هەڵگەڕابێتەوە، بە هاتنی دۆناڵد ترەمپ خەریكە دەسەڵاتی ئێران لە ناوچەكە روو لە لاوازییە و دیار نییە كەی وازی لێ دێنن، ئەمەریكا ئێرانی لە نێوان رێككەوتن بە مەرجی خۆی و شەڕ سەرپشك كردووە، ئێران ئەزموونی شەڕی لەگەڵ ئەمەریكا هەیە كە هیچ ئەنجامێكی نییە، بۆیە تاكە رێگە لەبەردەم سەركردەكانی ئێران جیاكردنەوەی دۆسیەی ئەتۆمی و بەرنامە مووشەكی و درۆنیەكەی و میلیشیاكانیەتی، دەستبەرداری خواستە ئەتۆمییەكی بێت بەرانبەر بە مانەوەی ئەوانی تری.
كەناڵی 14ی ئیسرائیلی ئاماژە بە بوونی ئاماژە بۆ ئەگەری هێرشێكی فرەوانی ئیسرائیل بۆ سەر ئێران لە داهاتووێكی نزیك دەكات، ئەوە لە سایەی زیادبوونی هەڕەشەكانی ئێران و پەرەسەندنی بەرنامە ئەتۆمییەكەی و زیادبوونی گوشارەكانی ئەمەریكا و لاوازبوونی میلیشیاكانی لە ناوچەكە.
بەپێی راپۆرتێكی كەناڵەكە، هێزی ئاسمانیی ئیسرائیل تەواو ئامادەن و چاوەڕوانی گڵۆپی سەوز بۆ ئەنجامدانی هێرشەكەیان بۆ سەر ئێران دەكەن، كە رەنگە بەهێزترین بێت و ببێتە هۆی رووخانی رژێمی فەرمانڕەوایی ئەو وڵاتە، رەنگە ئەمەریكاش بەشداری هێرشەكە ببێت، لە بەرانبەردا پێشبینیی وەڵامدانەوەیەكی توندی مووشەكیی ئێرانی دەكرێت، كە ئەگەر رووبدات ئیسرائیل تەواوی دامەزراوە ئەتۆمییەكانی ئێران لەناو دەبات و راستەوخۆ سوپای پاسداران دەكاتە ئامانج، ئەوانەش گۆڕانكاریی گەورە لەو وڵاتە دروست دەكەن.
وەڵام بدەوه