لە یەکەم لێدوانیدا لە دوای هەڵپەساردنی یارمەتییە سەربازییەکانی ئەمریکا بۆ ئۆکراینا، سەرۆکی ئۆکراینا ڤلادیمیر زێلێنسکی، ڕۆژی سێشەممە، پەشیمانیی خۆی بەرامبەر بەو ئەو دەمەقاڵەی لە کۆشکی سپی ڕووی دا دەربڕی و سوپاسگوزاریی خۆی بۆ واشنتۆن دووپات كردەوە.
زێلێنسکی لە پۆستێکدا لە تۆڕی كۆمەڵایەتیی (ئێکس) دەڵێ:"کۆبوونەوەکەمان لە کۆشکی سپی، بەو شێوەیە نەڕۆیشت کە بڕیار بوو."
دەشڵێ: "ئێمە ئەو کارانەی ئەمریکا کردوویەتی بۆ پاراستنی سەروەری و سەربەخۆیی ئۆکراینا بەرز دەنرخێنین، ئێمە ئەو ساتەمان لەبیرە کە شتەکان گۆڕان، کاتێک سەرۆک ترەمپ چەکی دابین کرد بۆ ئۆکراینا."
سەرۆکی ئۆکراینا دەشڵێت:"ئۆکراینا ئامادەیە بە زووترین کات لەسەر مێزی دانوستان دابنیشێت بۆ بەدەستهێنانی ئاشتییەکی بەردەوام، من و تیمەکەم ئامادەین لەژێر سەرکردایەتیی بەهێزی سەرۆک ترەمپ کار بکەین بۆ بەدەستهێنانی ئاشتییەکی بەردەوام".
ئاماژەی بەوەش کردووە: "ئێمە ئامادەین بەخێرایی کار بکەین بۆ کۆتاییهێنان بە جەنگ، سەرەتاش دەکرێت ئازادکردنی دیلەکان بێت، ئاگربەستی ئاسمانی و قەدەغەکردنی مووشەکی دوورمەودا و فڕۆکەی بێفڕۆکەوان بگرێتەوە، هەروەها دەستبەجێ ئاگربەست لە ڕووبەڕووبوونەوەی دەریاییدا بكرێ. ئەگەر ڕووسیاش هەمان شت بکات ئەوا ئێمە دەمانەوێت زۆر بەخێرایی هەنگاو بنێین لە هەموو قۆناغەکانی داهاتوودا و لەگەڵ ئەمریکا کار بکەین بۆ گەیشتن بە ڕێککەوتنێکی کۆتایی."
وەڵام بدەوه