سه‌رۆكی ڕووسیا وه‌ڵامی لێدوانه‌كانى سه‌رۆكی ئه‌مریكا ده‌داته‌وه و، ڕایده‌گه‌یه‌نێت، ده‌كرا جه‌نگی ئۆكرانیا ڕووی نه‌دایه گه‌ر تره‌مپ له هه‌ڵبژاردنى پێشوودا سه‌ركه‌وتوو ببوایه.
ڤلادمیر پوتین، سه‌رۆكی ڕٍووسیا وه‌ڵامی لێدوانه‌كانى دۆناڵد تره‌مپ، سه‌رۆكی ئه‌مریكا ده‌داته‌وه و ده‌ڵێت: "ئه‌مه‌وێت پێت بڵێم، كه ڕووسیا هیچ كات په‌یوه‌ندیكردنى به ئیداره‌ى ئه‌مریكاوه، ڕه‌ت نه‌كردووه‌ته‌وه".
هه‌روه‌ها ئه‌وه‌ش ده‌خاته‌ڕوو، كه له‌گه‌ڵ تره‌مپ له‌سه‌ر بنه‌ماى به‌رژه‌وه‌ندییه‌كان په‌یوه‌ندی كرداری هه‌یه، ده‌شڵێت: "ئێمه كراوه‌ین بۆ كاركردن له‌گه‌ڵ سه‌رۆكی ئه‌مریكا، ئاماده‌شین بۆ وتوێژكردن له‌باره‌ى ئۆكرانیاوه".
جه‌ختیش ده‌كاته‌وه، كه هاوڕایه له‌گه‌ڵ تره‌مپ له‌وه‌ى ده‌كرا خۆیان له جه‌نگی ئۆكرانیا دوور بگرتایه ئه‌گه‌ر تره‌مپ له هه‌ڵبژاردنى پێشوو سه‌ركه‌وتوو ببوایه.
چه‌ند جارێكه ئیداره‌ى نوێی ئه‌مریكا ئاماژه به‌وه ده‌ده‌ن كه تره‌مپ ده‌یه‌وێت له‌گه‌ڵ پوتین گفتوگۆ بكات، له وه‌ڵامیشدا كرمیلین ئاماده‌یی ڕووسیای ده‌ربڕی بۆ گفتوگۆكردن له‌گه‌ڵ سه‌رۆكى نوێی ئه‌مریكا.
وەڵام بدەوه