جیفری پایەت، یاریدەدەری وەزارەتی دەرەوەی ئەمەریكا بۆ كاروباری وزە سەردانی عێراقی كرد و لەگەڵ زیاد عەلی فازڵ، وەزیری كارەبا كۆبووەوە، باسی پەلەكردن لە جێبەجێكردنی یاداشتە واژووكراوەكانی نێوانیان لە واشنتن لە كاتی سەردانەكەی سەرۆك وەزیرانی عێراق لە ناوەڕاستی مانگی نیسانی رابردوو كرا.
وەك لە بەیاننامەیەكی نووسینگەی راگەیاندنی وەزیری كارەبای عێراق هاتووە، لە كۆبوونەوەكە لە نووسینگەی وەزیری كارەبای عێراق كە باڵوێزی ئەمەریكا لە بەغدا ئامادەی بوو، هەردوولا باسی هاوكاریی نێوانیان لە بواری وزە كردووە، وەزیری كارەبا باسی پڕۆژەكانی بەرهەمهێنان و گواستنەوەی كارەبا و پلانەكانی وەزارتەكەی بۆ جۆراوجۆركردنی سەرچاوەی كارەبا كردووە.
جیا لەوە باسی رۆڵی كۆمپانیاكانی ئەمەریكی و بیانی و بەشداریكردنیان لە نوێكردنەوەی ژێرخانی كەرتی كارەبای عێراق كرد، باسی خێراكردنی هەنگاوەكانی جێبەجێكردنی بڕگەكانی یاداشتی لێكتێگەیشتنی لە نێوان هەردوو وڵات لە میانی سەردانەكەی سوودانی بۆ واشنتن واژوو كراوە، لەوانە بەرهەمهێنانی سێ هەزار مێگاوات لە پڕۆژەكانی وزەی نوێبووەوە.
شایەنی باسە ئەمڕۆ وەزارەتی دەرەوەی ئەمەریكا لەبارەی سەردانەكەی یاریدەدەری وەزیری دەرەوەی ئەمەریكا بۆ كاروباری وزە بۆ عێراق رای گەیاند كە لەگەڵ سوودانی باسی لە گرنگیی دەست پێكردنەوەی هەناردەی نەوتی هەرێمی كوردستانی لە رێگەی بۆری نەوتی عێراق- توركیا كردووە، ئەو سەردانی هەولێریش دەكا و لەگەڵ بەرپرسانی هەرێمی كوردستان كۆ دەبێتەوە، باس لە راكێشانی وەبەرهێنانی بیانی بۆ كوردستان و گرنگی دەست پێكردنەوەی هەناردنی نەوت دەكات.
وەزارەتی دەرەوەی ئەمەریكا دووپاتی كردەوە كە گازی سروشتیی كوردستان بۆ عێراق گرنگە بۆ ئەوەی بگاتە ئاستی خۆبژێوی و سەربەخۆیی لە بواری وزەدا، بۆیە نەوتی هەرێمی كوردستان هاوكارێكی باش دەبێت بۆ كەمكردنەوەی هەناردنی نەوتی رووسیا بۆ ئەوروپا.
ئەمڕۆ چوارشەم یاریدەدەری وەزیری دەرەوەی ئەمەریكا بۆ كاروباری وزە گەیشتە عێراق، ئەلینا رۆمانۆوسكی، باڵویزی ئەمەریكا لەبارەی سەردانەكە لە تۆڕی ئێكس نووسیویەتی، ئامانجی هاتنی بەرپرسە ئەمەریكییەكە بەدواداچوونە بۆ دۆسیەی سەردانەكەی محەمەد شیاع سوودانی، سەرۆك وەزیرانی عێراق بۆ واشنتن، ئامانجێكی تری سەردانەكە بەهێزكردنی هاوكارییە دوو قۆڵییەكانی نێوان واشنتن و بەغدایە لە بواری وزەدا.
وەڵام بدەوه