بەپێی یاسایەكی نوێی دەزگای كۆچی سوید كە لەمڕۆوە 1.11.2023 جێبەجێ دەكرێ، مافی نیشتەجێبوونی كار لەم وڵاتەدا تەنها ئەو كەسانە دەگرێتەوە كە لە مانگێكدا زیاتر لە 27 هەزار و 360 كرۆن داهاتیان هەیە، كە دەكاتە نزیكەی دوو هەزار و 500 دۆلاری ئەمریكی.
ئەم یاسایە نوێیەی سوید لە كاتێكدایە كە پێشتر هەر كەسێكی دەرەوەی یەكێتیی ئەورووپا، بۆ وەرگرتنی مافی نیشتەجێبوونی كار لە سوید، تەنها پێویستی بە 13 هەزار كرۆنی مانگانە هەبوو، كە دەكاتە نزیكەی یەك هەزار و 200 دۆلاری ئەمریكی.
بەم هۆیەوە وەك رادیۆی سوید بڵاوی كردووەتەوە، چاوەڕوان دەكرێ لەم مانگە بەدواوە سەدان پەنابەری تر كە لە ڕێگەی كاركردنەوە مافی مانەوەیان لە سوید پێ دراوە، ناچار بكرێن بە جێهێشتنی سوید و دیپۆرتی وڵاتەكانیان بكرێنەوە.
جێی باسە لە چەند هەفتەی رابردوودا سەدان پەنابەر بەهۆی وەرنەگرتنی مافی پەنابەری لەو وڵاتەدا، بەزۆرەملێ دیپۆرتی وڵاتەكانی خۆیان كرابوونەوە.
ئەمەش لە كاتێكدایە كە زۆربەی پیشەكانی پەنابەران لە سوید وەریدەگرن، داهاتەكانیان لەو بڕە پارەیە كەمترە كە دەزگای كۆچی سوید دایناوە، بەتایبەتی كار و پیشەكانی وەكو چاودێریی بەساڵاچووان، کارکردن لە چێشتخانە و هۆتێلەکان.
وەڵام بدەوه