رۆژی چوارشەممە 18ی تشرینی یەکەمی 2023، فەرماندەیی ناوەندیی هێزەکانی ئەمریکا، ناسراو بە سێنتکۆم لە بەیاننامەیەکدا کە کۆپییەکی بۆ رووداو ناردووە، ئاشکرای کرد لە ماوەی 24 کاژێری رابردوودا سوپای ئەمریکا سێ درۆنی لە نزیک هێزەکانی ئەمریکا و هاوپەیمانان لە رۆژئاوا و باکووری عێراق تێکشکاندووە.
سەبارەت بە هێرشەکەی رۆژئاوای عێراق (بنكەی ئاسمانیی عەین. ئەسەد)، سێنتکۆم رایگەیاندووە "لە رۆژئاوای عێراق هێزەکانی ئەمریکا دوو درۆنیان تێکشکاندووە؛ یەکێکیان لەناوبردووە و زیانیان بە دووەمیش گەیاندووە، لە ئەنجامدا هەندێک لە هێزەکانی هاوپەیمانان بە سووکی برینداربوون".
هەروەها فەرماندەیی ناوەندیی هێزەکانی ئەمریکا باس لە تێکشکاندنی سێیەم درۆن لە ماوەی 24 کاژێری رابردوودا دەکات، کە ئەمەی دواییان لە "باکووری عێراق" بووە (بنکەی ئاسمانیی هەریر) و، دەڵێت "لە ئەنجامدا هیچ زیانێکی نەبووە. ئێمە بەردەوامین لە هەڵسەنگاندنی کاریگەرییەکانی ئەو ئۆپەراسیۆنانە."
لە درێژەی راگەیێندراوەکەدا، فەرماندەیی ناوەندیی هێزەکانی ئەمریکا ئاماژە بەوەدەکات لەم ساتەی دۆخەکە بەرەو گرژیی دەڕوات، "بە وریاییەوە چاودێری دۆخی عێراق و ناوچەکە دەکەین".
فەرماندەییەکە دەشڵێت "ئێمە، دەمانەوێت جەخت لەوە بکەینەوە، هێزەکانی ئەمریکا بەرگری لە هێزەکانی ئەمریکا و هاوپەیمانان لە بەرامبەر هەر هەڕەشەیەک دەکەن."
وەڵام بدەوه