با لایەنە سیاسیەکان ساڵوەگەڕی کۆچی دوایی ئیدریس بارزانی بکەن بە هەوێنی یەکڕیزی و تەبایی و جۆشدانی ئینتیمای نیشتیمانپەروەری و یەکپارچیەییەوە.
مێژووی خەباتی ئیدریس بارزانی تژی کەوتن و هەڵسانەوەو کۆڵنەدان و خۆراگری بوو.
ئیدریس بارزانی بەو تەمەنە کەمەی هەیبوو توانی کاریگەریەکی گەورە لە ئاڕاستەی بزاڤی رزگاریخوازی کورد بکات و هەورازو نشێوەکانی مێژوویەکی پر دەردەسەری و نەهامەتی بکات بە هەوێنی یەکڕیزی و دامەزراندنی بەرەی کوردستانیەوە.
کۆکردنەوەی سەرجەم لایەنە سیاسیە کوردیەکانی پێک ناکۆکەکانی بەرهەڵستکاری بەعس لە ژێر چەترێکی نیشتیمانی و رۆحی نەتەوەیی و جۆشدانی هێزو حەماسی شۆڕشگێڕی لە ناوەڕاستی هەشتاکان، لاپەرەیەکی پرشنگدارە لە خەرمانەی تەمەن و کارنامەی جموجۆڵە سیاسیەکانی ئیدریس بارزانی رەحمەتیدا.
ئەم بکەرە سیاسیە بەو تەمەنە کەمە پرلە ئەزمون و زانست و مەعریفەی سیاسی و هونەری دیپلۆماسیەی هەیبوو، توانی لە سەردەمێکی زۆر هەستیارو پرلە ناخۆشی و هەڵکشان و داکشانی سیاسی و سەربازیدا، خۆی و ئەزمونەکەی بخاتە خزمەت یەکڕیزی و تەباییەوە.
کۆچی رەحمەتی ئیدریس بارزانی نەک هەر بۆ پارتیەکان، بەڵکو بۆ کوردی هەر چوار پارچەی کوردستان بە گشتی و سەرجەم لایەنە سیاسیە کوردستانیەکان بەتایبەتی و پرۆژەی خەبات لە پێناو ئازادیدا، کۆستێکی گەورە بوو و مەرگی ناوبراو بۆشاییەکی گەورەی خستە نێو ڕیزەکانی لایەنە سیاسیەکان و خەباتی گەلی کوردلە پێناو ئازادیدا.
وەڵام بدەوه