دادگای فیدڕاڵی خۆی بۆتە گرفت

ئەوەی لەو عێراقە زۆرەو هەرگیز لەکورتی نادات، قەیران و کێشەو ئاڵۆزی و ناکۆکی و پێکدادانە. 
ئەوەی لە هەموو شتیش زیاتر پێویستەو وەک نان و ئاو پێداویستیەکی حەتمیە، خاوکردنی گرژی و ئاڵۆزیەکان و هەنگاونانە بەرەو چارەسەر کردنی کێشەو گرفت و ناکۆکیەکان و هێنانەکایەی تەناهی و ئارامی و گێڕانەوەی متمانەیە لە نێوان پێکهاتە ئەتنیەکانی عێراقدا. 

دادگای فیدڕاڵی لە بری دۆزینەوەی چارەسەر بۆ گرفتەکان خۆی بۆتە هۆکاری گرفت و رێک ئەو رۆڵە دەگێڕێ، نەیاران و تێکدەرانی دۆخی عێراق ئاواتی پێوە دەخوازن. 

ئەوەی بۆ دۆخی ئاڵۆزو لەرزۆکی سیاسی و ئەمنی عێراق لەم دادگایە چاوەروان دەکرێ، هێورکردنەوەی دۆخەکەو خستنەرووی چارەسەرو دەرکردنی بریارگەلێکە لە بەرژەوەندی سەرجەم پێکهاتەکانی عێراقی بە کوردیشەوە دابێ، نەک هەوڵدان بۆ شێواندنی بارودۆخی سیاسی و دروست کردن ئاڵۆزی و ئاستەنگ دروست کردن لەبەردەم رێکارەکانی چارەسەری و دواجار دروست کردنی ناسەقامگیری.